ەلدە 65 جانە ودان جوعارى جاستاعى ادامداردىڭ سانى 10،24 ميلليونعا جەتتى.
بىرىككەن ۇلتتار ۇيىمىنىڭ باعالاۋى بويىنشا بۇل ەڭ جوعارى كورسەتكىش. ال بۇعان بيلىك قاتتى الاڭداۋلى. ويتكەنى وڭتۇستىك كورەيا تۋۋ كورسەتكىشى ەڭ تومەن ەل، دەپ حابارلايدى aqshamnews.kz 24.kz-كە سىلتەمە جاساپ.
وڭتۇستىك كورەياداعى قارت ادامدار ەلدەگى 51،22 ميلليون حالىقتىڭ 20 پايىزىن قۇرايدى. بىرىككەن ۇلتتار ۇيىمى 65 جانە ودان جوعارى جاستاعى ادامدار سانى 7 پايىزدان اساتىن ەلدەردى قارتايعان قوعام، 14 پايىزدان اساتىن ەلدەردى قارتتار قوعامى ال 20 پايىزدان اسcا وتە قارت قوعام ساناتىنا جاتقىزادى. ءارى بىلتىردان بەرى 0،72 كورسەتكىشپەن تۋۋ دەڭگەيى ەڭ تومەن ەلدەردىڭ قاتارىندا تۇرعان وڭتۇستىك كورەيادا الەۋمەتتىك-ەكونوميكالىق سەبەپتەرگە بايلانىستى تۋۋ كورسەتكىشى ازايىپ بارادى.
لي سان ليم، كورەيا ۇلتتىق ۋنيۆەرسيتەتىنىڭ دوكتورى:
-تۋۋ دەڭگەيىنىڭ 0،72ء-نى كورسەتۋى – بۇرىن-سوڭدى بولماعان كورسەتكىش. وسىعان ۇقساس جاعدايلار 1990 جىلى گەرمانيانىڭ قايتا بىرىگۋى كەزىندە دە ورىن الدى. ول كەزدە تۋۋ كورسەتكىشى 0،77-گە دەيىن تومەندەدى. سونداي-اق ەۋروپاداعى توقىراۋ جىلدارىندا ۆەنا سياقتى ءىرى قالالاردا ءبىر ايەل ءبىر بالادان ارتىق تۋمايتىن. ال وڭتۇستىك كورەياداعى قازىرگى جاعدايدىڭ ەرەكشەلىگى - توقىراۋ ەمەس ەكونوميكامىز تۇراقتى كەزدە وسىنداي جاعدايدىڭ ورىن الۋى.
تۋۋ كورسەتكىشىنىڭ تومەندەۋى، جاڭا وتباسىلار سانىنىڭ ازدىعىنا بايلانىستى. بۇل ءۇردىس ەكونوميكاسى دامىعان ەلدەر ءۇشىن قالىپتى جايت. ەر ادامدار وتباسى قۇرۋداعى جاۋاپكەرشىلىكتەن قاشسا، قىزدار بالالى بولۋدان گورى مانساپتى ويلايدى. ويتكەنى تۇرعىن ءۇي باعاسىنىڭ كۇن ساناپ ءوسۋى مەن بالا كۇتىمىنە كەتەتىن شىعىنعا باس قاتىرعىسى كەلمەيدى دەيدى، ساراپشىلار.
لي سان ليم، كورەيا ۇلتتىق ۋنيۆەرسيتەتىنىڭ دوكتورى:
بۇل وقيعالار ساياسي قاتەلىكتەرمەن تىكەلەي بايلانىستى. 2010 جىلدان باستاپ مەملەكەت جىلجىمايتىن مۇلىك نارىعىن ىنتالاندىرۋ ءۇشىن نەسيەنى ەڭ جوعارى سوماعا دەيىن كوتەردى. سالدارىنان تۇرعىن ءۇي مەن جالدامالى پاتەر باعاسى شارىقتاپ كەتتى. وسى كەزدە قوعام ىشىندە سمارتفوندار مەن الەۋمەتتىك جەلىلەردىڭ تانىمالدىلىعى ارتتى. جاستار وزدەرىنىڭ ءومىر ءسۇرۋ سالتىن باسقالارمەن سالىستىرا باستادى، باسەكەلەستىكتىڭ جاڭا ءتۇرى پايدا بولدى. وسىلايشا ولار بالا تۋۋعا ۇلكەن ماسەلە رەتىندە قارادى.
بيلىك كەيىنگى 15 جىل بويى تۋۋ كورسەتكىشىن كوتەرۋ ءۇشىن 200 ميللياردتان استام قاراجات جقمسادى. ءبىراق ناتيجەسىز. بيىل ەل بويىنشا توتەنشە جاعداي جاريالانىپ، ۇكىمەتكە دەموگرافيالىق داعدىرىستى ءبىر قالىپقا كەلتىرۋگە تاپسىرما بەرىلدى. ساراپشىلار جىل سوڭىندا كورسەتكىش 0،68 پايىزعا دەيىن تومەندەيدى دەپ بولجايدى. ەگەر بيلىك تاراپىنان جاسالاتىن شارالار كۇشەيتىلمەسە، عاسىر سوڭىندا حالىق سانى 2 ەسە قىسقارۋى مۇمكىن.