وڭتۇستىككورەيالىق جۇلدىزدار الماتىدا Netflix ءۇشىن تريەۆەل-شوۋ ءتۇسىرىپ جاتىر، - دەپ حابارلايدى اqshamnews.kz ءتىلشىسى.
الماتى جاھاندىق كرەاتيۆتى يندۋستريانىڭ جاڭا وشاعىنا اينالۋدا. 24-27 شىلدە ارالىعىندا قالا مەن ونىڭ كورىكتى اۋماعى تانىمال وڭتۇستىككورەيالىق Hit And Miss Tour 4 تريەۆەل-شوۋىنىڭ ءتۇسىرىلىم الاڭى بولدى. جوبا Channel S تەلەارناسىنان كورسەتىلىپ، كەيىن Netflix پلاتفورماسىندا بۇكىل الەم كورەرمەنىنە جول تارتادى.
شوۋدىڭ باستى كەيىپكەرلەرى – وڭتۇستىك كورەيانىڭ تانىمال كومەديا شەبەرلەرى كيم دە حي، كيم دجۋن حو، چان دون مين، يۋ سە يۋن جانە حون ين گيۋ. رەاليتي فورماتىنداعى بۇل جوبا ءار ەلدە جاڭا اسەر مەن كۇلكىگە تولى ساياحاتتى كورسەتەدى. قاتىسۋشىلار كۇن سايىن ءتۇرلى ويىندار مەن تاپسىرمالار ورىندايدى، ال جەڭىلگەندەر توپتىڭ جول شىعىنىن وتەيدى. بۇل ەرەجە ءار لوكاسيانى ناعىز شوۋ الاڭىنا اينالدىرادى.
الماتىداعى ءتۇسىرىلىم 28 گۆاردياشى-پانفيلوۆشىلار ساياباعى، ۆوزنەسەنسك كافەدرالدى شىركەۋى، كوكبازار، شىمبۇلاق، كوكتوبە سياقتى قالانىڭ تانىمال ورىنداردا ءوتتى. سونداي-اق، ءتۇسىرۋ توبى الماتى ماڭىنداعى شارىن شاتقالىنا، كولساي مەن قايىڭدى كولدەرىنە دە ات باسىن بۇردى.
جوبا الماتى قالاسى تۋريزم باسقارماسىنا قاراستى Almaty Tourism Bureau-نىڭ قولداۋىمەن، كرەاتيۆتى ءتۋريزمدى دامىتۋ اياسىندا جۇزەگە استى. بۇل باعىتتاعى نەگىزگى قۇرالداردىڭ ءبىرى كينو جانە تەلەجوبالاردى قالاعا تارتۋعا ارنالعان Location Scout قىزمەتى. بيۋرو تاراپىنان ءتۇسىرىلىم توپتارىنا لوكاسيانى ىرىكتەۋ مەن رۇقسات الۋ ساتىنەن باستاپ ءتۇسىرىلىم بارىسىنا دەيىنگى جان-جاقتى كومەك كورسەتىلدى.
– الماتىنىڭ وسىنداي حالىقارالىق جوبالاردا كورىنىس تابۋى جاي عانا ادەمى كورىنىس ەمەس، بۇل قالانىڭ جانە ەلدىڭ تۋريستىك الەۋەتىن ستراتەگيالىق دەڭگەيدە ىلگەرىلەتۋ. شەتەلدىك جوبالاردىڭ الماتىنى تاڭداپ جاتقانىنا قۋانىشتىمىز، – دەدى Almaty Tourism Bureau باسشىسى ديار اسقاروۆ.
Hit And Miss Tour 4 باعدارلاماسىنىڭ پرەمەراسى 23 جانە 30 تامىزدا، سونداي-اق، 6 قىركۇيەكتە وتەدى. جوبا ناتيجەسىندە الماتىعا دەگەن قىزىعۋشىلىقتىڭ ارتىپ، قالانىڭ حالىقارالىق تۋريستىك ءيميدجى نىعايا تۇسپەك.
ايتا كەتەيىك، Netflix پلاتفورماسىنىڭ الەم بويىنشا 300 ميلليوننان استام وقىرمانى بار، ال جالپى اۋديتورياسى 700 ميلليون ادامنان اسادى.
2025 جىلدىڭ العاشقى توقسانىندا الماتىعا 145 مىڭ شەتەلدىك تۋريست ساياحاتتاپ كەلگەن. بۇل وتكەن جىلمەن سالىستىرعاندا 18% ارتىق. قالاعا كوبىنە ءۇندىستان، جۇڭگو مەن تۇركيادان، سونىمەن قاتار اقش، ءباا، وڭتۇستىك كورەيا، ۇلىبريتانيا جانە گەرمانيادان كەلگەن ساياحاتشىلار ءجيى ات باسىن بۇرادى.