الماتىداعى ىقىلاس اتىنداعى حالىق مۋزىكالىق اسپاپتار مۋزەيىندە «ەتنوالەم: ءبىر شاڭىراق استىندا» اتتى كورمە ءوز جۇمىسىن باستادى.
قازاقستان حالقى اسسامبلەياسىنىڭ 30 جىلدىعىنا وراي «افريكالىق ەتنو- مادەني ورتالىقپەن» بىرلەسىپ ۇيىمداستىرىلعان بۇل كورمەنىڭ باستى ماقساتى – قازاقستاندا ءومىر ءسۇرىپ جاتقان ءتۇرلى ەتنوستاردىڭ باي مادەني مۇراسىن كەڭىنەن تانىستىرىپ، ەتنوسارالىق كەلىسىم مەن ءوزارا قۇرمەتتى نىعايتۋ. ءىس-شارا قوعامداعى بەيبىتشىلىك پەن تاتۋلىقتى دارىپتەي وتىرىپ، كەلۋشىلەرگە ءار ەتنوستىڭ بولمىسىن، تۇرمىس-تىرشىلىگىن، ونەرى مەن ءداستۇرلەرىن تەرەڭىرەك تانۋعا مۇمكىندىك بەرەدى.
كورمەدە افريكا حالىقتارىنىڭ مۋزىكالىق اسپاپتارى، ۇلتتىق كيىمدەرى، تۇرمىستىق بۇيىمدارى مەن قولونەر تۋىندىلارى ۇسىنىلعان. افريكا حالقىنىڭ مادەنيەتى مەن تاريحىنا ارنالعان ءبولىم كورەرمەندەر تاراپىنان ەرەكشە قىزىعۋشىلىق تۋدىرىپ وتىر. بۇل بولىمدە افريكالىق مۋزىكالىق اسپاپتار، ساندىك-قولدانبالى ونەر تۋىندىلارى جانە ەتنيكالىق نىشاندار كوپشىلىك نازارىنا ۇسىنىلعان. كەلۋشىلەر ءۇشىن بۇل كورمە – تەك مادەني تانىسۋ الاڭى عانا ەمەس، سونىمەن بىرگە ۇلتارالىق دوستىق پەن ىنتىماقتاستىقتى نىعايتاتىن ماڭىزدى پلاتفورما.
كورمە قوناقتارى اشىلۋ سالتاناتىندا افريكا حالقىنىڭ ۇلتتىق مۋزىكالىق اسپاپتارىمەن كەڭىنەن تانىستى. اسىرەسە، افريكالىق دجەمبە بارابانى ەرەكشە قىزىعۋشىلىق تۋدىردى. ءىس-شارا بارىسىندا ۇلتتىق ونەردىڭ توعىسۋىن بەينەلەيتىن مۋزىكالىق قويىلىم ۇيىمداستىرىلىپ، وندا افريكالىق دجەمبەنىڭ ءۇنى مەن قازاقتىڭ ءتول اسپابى – دومبىرانىڭ كۇمبىرى ۇيلەسىم تاۋىپ، كورەرمەندەردىڭ ىستىق ىقىلاسىنا بولەندى. بۇل ەرەكشە مۋزىكالىق سينتەز – تەك ونەردىڭ شەكاراسى بولمايتىنىن عانا ەمەس، مادەنيەتتەردىڭ ۇندەستىگىن دە ايقىن كورسەتتى. دومبىرا مەن دجەمبە ءۇنى ارقىلى ءتۇرلى حالىقتاردىڭ ءبىر شاڭىراق استىنداعى تاتۋلىعى مەن رۋحاني جاقىندىعى ايقىن سەزىلدى.
قازاقستان حالقى اسسامبلەياسى – ەلدەگى تۇراقتىلىق پەن بىرلىكتىڭ سيمۆولىنا اينالعان بىرەگەي قۇرىلىم. وسى ورايدا قولعا الىنعان «ەتنوالەم: ءبىر شاڭىراق استىندا» كورمەسى قوعامدىق كەلىسىم مەن جالپىۇلتتىق بىرەگەيلىكتى دامىتۋ جولىنداعى يگى باستامالاردىڭ ءبىرى بولىپ وتىر.
كورمە 2025 جىلدىڭ 12 تامىزىنا دەيىن جالعاسادى.