جىل سوڭىنا دەيىن 6 ميكروقارجىۇيىمىندا تەكسەرۋ اياقتالادى
جىل باسىنان بەرى ەلدەگى 70-تەن استام ميكروقارجى ۇيىمى ليسەنزيالارىنان ايىرىلعان، دەپ حابارلايدى Almaty-akshamy.kz.
بۇل جايىندا ق ر قارجى نارىعىن رەتتەۋ جانە دامىتۋ اگەنتتىگى ءمالىم ەتتى.
«ق ر قارجى نارىعىن رەتتەۋ جانە دامىتۋ اگەنتتىگى ميكروقارجىلاندىرۋ نارىعىن قىزمەتى ولارعا قويىلاتىن تالاپتارعا سايكەس كەلمەيتىن جانە تۇتىنۋشىلاردىڭ مۇددەلەرىنە ايتارلىقتاي ءقاۋىپ توندىرەتىن جوسىقسىز قاتىسۋشىلاردان تازارتۋ اعىتىندا تۇراقتى نەگىزدە جۇمىس جۇرگىزىپ وتىرادى. 2022 جىلدىڭ باسىنان بەرى ميكروقارجىلىق قىزمەت جۇزەگە اسىراتىن 72 ۇيىمعا، ونىڭ ىشىندە 18 ميكروقارجى ۇيىمى مەن 42 لومباردقا، 8 كرەديتتىك سەرىكتەستىككە ليسەنزيادان ايىرۋ سانكسياسى قولدانىلدى»، - دەدى اگەنتتىك.
رەسمي مالىمەتكە سۇيەنسەك، اتالعان ۇيىمداردىڭ قىزمەتىن توقتاتۋعا مىنانداي جايتتار نەگىز بولعان: 10 ميكروقارجى ۇيىمى، 7 لومبارد جانە 6 كرەديتتىك سەرىكتەستىك ليسەنزيا العان كۇننەن باستاپ التى اي ىشىندە جۇمىس ىستەمەگەن؛ 1 ميكروقارجى ۇيىمى ۋاكىلەتتى ورگاننىڭ جازباشا ۇيعارىمدارىن جۇيەلى تۇردە (ءبىر جىلدىڭ ىشىندە ءۇش جانە ودان دا كوپ رەت) ورىنداماعان؛ 1 ميكروقارجى ۇيىمى قىزمەتىن زاڭداردىڭ، ۋاكىلەتتى ورگاننىڭ، ۇلتتىق بانكتىڭ نورماتيۆتىك قۇقىقتىق اكتىلەرىنىڭ تالاپتارىن جۇيەلى تۇردە (ءبىر جىلدىڭ ىشىندە ءۇش جانە ودان دا كوپ رەت) بۇزا وتىرىپ جۇزەگە اسىرعان، سونداي-اق زاڭنامادا رۇقسات ەتىلمەگەن قىزمەت تۇرلەرىن كورسەتكەن؛ 6 ميكروقارجى ۇيىمى، 39 لومبارد جانە 2 كرەديتتىك سەرىكتەستىك قايتا ۇيىمداستىرۋعا نەمەسە تاراتۋعا بايلانىستى قىزمەتتى ەرىكتى تۇردە توقتاتقان.
«سونىمەن قاتار «لومبارد Astana Gold» ج ش س ليسەنزياسىنىڭ قولدانىسى ۋاكىلەتتى ورگاننىڭ جازباشا ۇيعارىمىن ورىنداماعانى ءۇشىن 08.08.2022ج. باستاپ 3 ايعا توقتاتىلدى. اگەنتتىك سوماسى 50 اەك-كە (153 150تەڭگە –رەد.) جەتپەيتىن قىسقا مەرزىمدى ونلاين ميكروكرەديتتەر ءوسىپ كەلە جاتقانىن بايقاپ وتىر. وسىعان بايلانىستى 50 اەك-كە دەيىنگى ونلاين ميكروكرەديتتەردىڭ شامامەن 80%-ى ۇلەسىنە تيەتىن 10 ءىرى ميكروقارجىۇيىمىن تەكسەرۋ جوسپارلانىپ وتىر. جىل سوڭىنا دەيىن 6 ميكروقارجىۇيىمىندا تەكسەرۋ اياقتالادى»، - دەپ تولىقتىردى قارجى ۇيىمى.