اباي اتىنداعى قازۇپۋ-دىڭ بازاسىندا عىلىم جانە جوعارى ءبىلىم مينيسترلىگى عىلىم كوميتەتى قارجىلاندىراتىن «وتىرار اۋدانىنداعى توپىراق تۇزدىلىعىنىڭ جۇگەرىنىڭ وسىپ-ونۋىنە اسەرىن زەرتتەۋ جانە داقىلدىڭ ونىمدىلىگىن بولجاۋدىڭ عارىشتىق ءادىسىن ازىرلەۋ» جوبا ءساتتى جۇزەگە اسىرىلۋدا.
تالانتتى عالىم، PhD دوكتورى – شاحيسلام لايسحانوۆ جەتەكشىلىك ەتەتىن عىلىمي جوبانى اباي ۋنيۆەرسيتەتىنىڭ گەوگراف-عالىمدارى جانە ءو.و. وسپانوۆ اتىنداعى قازاق توپىراقتانۋ جانە اگروحيميا عىلىمي زەرتتەۋ ينستيتۋتىنىڭ توپىراقتانۋشى-عالىمدارى بىرلەسىپ ورىنداۋدا. جوبا اياسىندا عالىمدار ءبىرشاما ناتيجەلەرگە قول جەتكىزىپ، ءبىرقاتار جاريالانىم جاساعان، دەپ حابارلايدى Almaty-akshamy.kz.
اتاپ ايتار بولساق، جوبا اياسىندا Scopus جانە Web of science حالىقارالىق دەرەكتەر بازاسىنا كىرەتىن جۋرنالداردا 3 ماقالا، عىلىم جانە جوعارى ءبىلىم سالاسىنداعى ساپانى قامتاماسىز ەتۋ كوميتەتى ۇسىنعان رەسەنزيالاناتىن وتاندىق باسىلىمدا 1 ماقالا، حالىقارالىق كونفەرەنسيالىق جيناقتا 1 ماقالا جانە 1 مونوگرافيا جاريالاعان.
جوبا اياسىندا عالىمدار وتىرار اۋدانىنىڭ جۇگەرى ەگىستىكتەرىندەگى توپىراقتاردىڭ تۇزدانۋى ۋاقىتتىق (مەزگىلدىك) جانە كەڭىستىكتىك تۇرعىدان قۇبىلاتىنىن انىقتاپ، بۇل قۇبىلىستىڭ مەزگىلدىك جانە كەڭىستىكتىك ديناميكاسىن جاساپ، زەرتتەۋ نىسانىنداعى توپىراقتاردىڭ تۇزدانۋ زاڭدىلىقتارىن انىقتاعان. سونىمەن قاتار، جۇگەرى ەگىستىكتەرىندەگى توپىراقتاردىڭ تۇزدانۋىن دالالىق زەرتتەۋ جانە عارىشتىق ادىستەردى قولدانا وتىرىپ زەرتتەۋ جانە جەردى قاشىقتان زەردەلەۋ مالىمەتتەرىن نەگىزگە الا وتىرىپ، تۇزدانۋ كارتاسىن قۇراستىرۋدىڭ الگوريتمدەرىن دايىنداعان.
قازىرگى تاڭدا، زەرتتەۋ توبى ەكى جىلدىق زەرتتەۋ ناتيجەسىندە جۇگەرى داقىلىنىڭ ونىمدىلىگىن بولجاۋدىڭ جاڭا ءادىسىن ازىرلەپ، ونى سىناقتان وتكىزۋ ماسەلەسىمەن اينالىسۋدا. «جوبا ناتيجەسىندە ازىرلەنەتىن ءادىستى قولدانۋ ارقىلى باسقا دا سۋارمالى جاعدايداعى جەرلەردە جۇگەرى وسىرگەن جاعدايدا، قانشا ءونىم بەرەتىنىن بولجاۋعا بولادى. بۇل ءادىس تەك جۇگەرىنىڭ ونىمدىلىگىن عانا ەمەس، باسقا داقىلداردىڭ ونىمدىلىگىن بولجاۋعا سەپتىگىن تيگىزە الادى. وسىلايشا، ونىمدىلىك الەۋەتى جوعارى جەرلەردى انىقتاپ، سۋارمالى ەگىستىك كولەمىن ۇلعايتۋ جانە اۋىلشارۋاشىلىق ءوندىرىستى ارتتىرۋ سياقتى جۇمىستارعا وڭ اسەر ەتەتىنى كۇتىلۋدە.
