شاھاردا «ءبىلىم ستۋدياسى» اشىلدى. ول – ونەرگە، شىعارماشىلىققا جاقىن 5-13 جاس ارالىعىنداعى ورەندەردى شەبەرلىككە باۋليتىن، ۇيرەتەتىن، دامىتاتىن ورتالىق. وندا وتەتىن ساباقتار باعدارلاماسىندا سۋرەت سالۋ، ءمۇسىن، گەرباريي جاساۋ نەگىزدەرى قاراستىرىلعان.
ورتالىقتاعى ورىنداردىڭ 25%-ى الەۋمەتتىك جاعىنان از قامتىلعان وتباسىلاردان شىققان بالالاردى تەگىن وقىتۋعا بولىنگەن. بۇل ونەر مەكتەبىندەگى تاعى ءبىر ەرەكشەلىك، ساباقتاردى قازاقستاننىڭ حالىق سۋرەتشىلەرى، ءبىلىم بەرۋ ۇزدىكتەرى جانە سۋرەتشىلەر وداعىنىڭ مۇشەلەرى سەكىلدى ناعىز كاسىبي ماماندار وتەدى.
ءبىلىم ستۋدياسىنا «الماتى» الەۋمەتتىك-كاسىپكەرلىك كورپوراسياسى ۇلكەن قولداۋ كورسەتتى. ناقتىراق ايتساق، ستۋدياعا ارنايى عيمارات ءبولىپ، وندا جەتكىنشەكتەردىڭ ساپالى ءبىلىم الۋى ءۇشىن جەكە سىنىپتار اشىپ بەردى.
– ونەردى دارىپتەۋگە، جاس ۇرپاقتىڭ شىعارماشىلىق الەۋەتىن دامىتۋعا باعىتتالعان وسىنداي ورتالىقتار اشۋ وتە ماڭىزدى. ءبىز وسىنداي الەۋمەتتىك جوبالاردى ودان ءارى قولداۋدى جانە كوكجيەگىن كەڭەيتۋدى جوسپارلاپ وتىرمىز، – دەدى «الماتى» الەۋمەتتىك-كاسىپكەرلىك كورپوراسياسى» اق-نىڭ باسقارما ءتوراعاسى ا.بىلىسبەكوۆ.
