وقۋ اياقتالعاننان كەيىن ءبىلىم الۋشى 70% شەكتى دەڭگەيمەن تەستىلەۋ تاپسىرۋى ءتيىس.
بىلتىر شىلدە ايىندا skills.enbek.kz ونلاين كاسىپتىك وقىتۋ پلاتفورماسى ىسكە قوسىلعان ساتتەن باستاپ 94،5 مىڭ ازامات، ونىڭ ىشىندە 19،5 مىڭ جۇمىسسىز ادام كۋرستان وتكەنى تۋرالى سەرتيفيكات الدى. پلاتفورمادا جالپى 126،9 مىڭ تۇلعا تىركەلدى، ونىڭ 113،4 مىڭى 2022 جىلى تىركەلگەن، دەپ حابارلايدى Almaty-akshamy.kz.
وقۋدان وتكەن 19،5 مىڭ جۇمىسسىزدىڭ 6 مىڭى – نەگىزىنەن الماتى، قىزىلوردا، قاراعاندى وبلىستارى مەن الماتى قالاسى جاستارى.
پلاتفورما ىسكە قوسىلعان ساتتەن باستاپ اۆتورلار وندا ءارتۇرلى باعىت بويىنشا 151 كۋرس جاريالادى، ونىڭ 97-ى تەگىن. كۋرستاردىڭ ۇزاقتىعى 1-دەن 72 ساعاتقا دەيىن.
« ەڭ تانىمال كۋرستار – «ءسۇتتى مال شارۋاشىلىعى»، «پەرسونالدى باسقارۋ»، «ا-دان يا-عا دەيىن قۇلپىناي ءوسىرۋ»، «كاسسير»جانە «ۇننان جاسالعان كونديتەر ونىمدەرى، جىكتەلۋى جانە دايىندالۋ تەحنولوگياسى»»،- دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
بۇدان بۇرىن حابارلانعانداي، پلاتفورما حالىقتىڭ ءبىلىم دەڭگەيى مەن كاسىبيلىگىن ارتتىرۋعا، مانساپتىق دامۋدى ىنتالاندىرۋعا جانە «ءومىر بويى وقىتۋ» تۇجىرىمداماسىن ىلگەرىلەتۋگە باعىتتالعان. ول ماركەتپلەيس – قىزمەتتەر نارىعى قاعيداتى بويىنشا ونلاين كۋرستارعا قول جەتكىزۋدى ۇسىناتىن حالىقارالىق وقىتۋ الاڭدارىنا ۇقساس قۇرىلعان.
وقۋعا تىكەلەي https://skills.enbek.kz/ سىلتەمەسى ارقىلى نەمەسە ەلەكتروندىق ەڭبەك بيرجاسىندا (enbek.kz) «ونلاين وقىتۋ» ءبولىمىن تاڭداۋ ارقىلى وتۋگە بولادى.
پلاتفورمادا ءبىلىم الۋشى وقىتۋدىڭ قولايلى قارقىنى مەن ءتىلدى، ماتەريالدى بەرۋدىڭ ىڭعايلى قاعيداتىن ءوز بەتىنشە تاڭدايدى، ءبىلىم بەرۋ پروسەسىندەگى ءوزىنىڭ پروگرەسىن باقىلاي الادى.
وقۋ اياقتالعاننان كەيىن ءبىلىم الۋشى 70% شەكتى دەڭگەيمەن تەستىلەۋ تاپسىرۋى ءتيىس. ونلاين كۋرستى ءساتتى اياقتاعان جاعدايدا داعدىلاردى يگەرۋ تۋرالى سەرتيفيكات بەرىلەدى. كۋرستى اياقتاۋدىڭ مىندەتتى شارتى – ستۋدەنت تاراپىنان كۋرستى باعالاۋ.
بۇل سەرتيفيكات ەلەكتروندىق ەڭبەك بيرجاسىندا (enbek.kz) تىركەلگەن كەزدە ءبىلىم الۋشى جاساعان تۇيىندەمەدە اۆتوماتتى تۇردە كورسەتىلەدى. قىزمەتكەرلەردى ىزدەۋ كەزىندە الەۋەتتى جۇمىس بەرۋشى skills.enbek.kz-تە تابىستى وقۋدان كەيىن الىنعان سەرتيفيكاتتاردى كورە الادى.
2022 جىلعى ناۋرىزدان باستاپ پلاتفورمادا قولدانىستاعى فۋنكسيونال وڭتايلاندىرىلىپ، جاڭا سەرۆيستەر ىسكە قوسىلعانىن ەستەرىڭىزگە سالا كەتەيىك.
اتاپ ايتقاندا، كۋرستاردى ىزدەۋ جەتىلدىرىلدى، ساباقتاردىڭ تۇسىنىكتى قۇرىلىمى جاسالدى، وقۋ پروسەسىن باقىلاۋ جانە كۋرس اۆتورلارىمەن جىلدام ءوزارا ارەكەتتەسۋ مۇمكىندىگى پايدا بولدى.
كۋرس اۆتورلارى ءۇشىن ىڭعايلى ساباق قۇراستىرۋشى قولجەتىمدى، جاريالانعان كۋرستاردىڭ ستاتيستيكاسى مەن تيىمدىلىگىن قاراۋ، سەرتيفيكاتتاردىڭ ءارتۇرلى ديزاينى قاراستىرىلعان، سونىمەن قاتار وقۋ قۇنىن الدىن-الا ەسەپتەۋگە ارنالعان ونلاين-كالكۋلياتور بار.
اۆتورلار مەن ازىرلەۋشىلەرگە ارنالعان پلاتفورمادا ونلاين كۋرستاردى ورنالاستىرۋ تەگىن. كۋرستار مەملەكەتتىك جانە ورىس تىلدەرىندە ورنالاستىرىلۋى مۇمكىن، اقپارات بەرۋدىڭ ءارتۇرلى فورماتتارى: ءماتىن، پرەزەنتاسيا، بەينە جانە اۋديو ماتەريالدار، ينفوگرافيكا جانە باسقا تۇرلەرى بولۋعا ءتيىس. ۇسىنىلاتىن ونلاين كۋرستاردىڭ ۇزاقتىعى 6-دان 144 ساعاتقا دەيىن. پلاتفورما ەرەكشە قاجەتتىلىكتەرى بار ستۋدەنتتەر ءۇشىن ينتەرفەيستى بەيىمدەۋ مۇمكىندىگى بار.
skills.enbek.kz-تە تىركەلۋ جانە پلاتفورمادا جۇمىس ىستەۋگە قاتىستى بارلىق سۇراق بويىنشا «ەردو» اق جاۋاپتى قىزمەتكەرلەرىمەن بايلانىسۋدى سۇرايمىز: 8 (7172) 95 43 17 (ىشكى. 877، 878).