«ءابىلحان قاستەيەۆتىڭ 120 جىلدىعى» حالىقارالىق بايقاۋى اياسىندا، حالىق سۋرەتشىسىنىڭ اتىن يەلەنگەن مەملەكەتتىك مۋزەيدە بالالار شىعارماشىلىعى كورمەسى ۇيىمداستىرىلدى. وندا ءمۇسىن، انيماسيا جانە ساندىك-قولدانبالى ونەر تۋىندىلارى قويىلدى. قاتىسۋشىلار بالاڭ كارتينالارىن حالىق سۋرەتشىسىنىڭ ونەرىن زەردەلەپ، شىعارمالارىنان شابىت الىپ، ءار ءتۇرلى تەحنيكا قولدانۋ ارقىلى بەينەلەگەن.
بايقاۋ باستاماشىسى – ءابىلحان قاستەيەۆ اتىنداعى بەينەلەۋ ونەرى جانە ديزاين مەكتەبىنىڭ ۇجىمى. اتالعان مەكتەپ سوناۋ 1981 جىلى قۇرىلعان. قازىرگى ۋاقىتتا مەكتەپتە «بەينەلەۋ ونەرى» جانە «تەحنيكا جانە ديزاين» دەگەن ەكى ءبولىم جۇمىس ىستەيدى. 30 جىلدان استام ۋاقىت ىشىندە ونەر مەكتەبى 100-دەن استام كونكۋرستىق جوبالارعا بەلسەندى قاتىسقان. بۇل ءىزدى ءقازىر دە جالعاپ كەلەدى.
مەكتەپ جىل سايىنعى رەسپۋبليكالىق پلەنەر-ماستەر-كلاسس وتكىزۋدىڭ باستاماشىسى بولىپ وتىرادى. وندا قازاقستان رەسپۋبليكاسى مەن شەتەلدىڭ تانىمال بەينەلەۋ جانە قولدانبالى ونەر شەبەرلەرى بالالار ءۇشىن شەبەرلىك ءھام شىعارماشىلىق ساباقتارى وتكىزىلىپ تۇرادى.
حالىقارالىق كورمەگە 500-دەن استام جۇمىس ۇسىنىلدى، وندا ەلىمىزدىڭ بارلىق ايماعى مەن كورشىلەس ەلدەردەن تىلەك بىلدىرگەن ورەندەر قاتىستى. ونەر دە جاس ۇرپاقتى جاقسىلىققا، ادامگەرشىلىك قاسيەتتەرگە باۋليتىنىن ەسكەرسەك، ءبىزدى ونەردى قادىرلەيتىن، جانى نازىك، سۋرەت سالۋعا قۇمار بالالاردىڭ كوپتىگى قۋانتتى.