«مونا ليزا» سورپاعا مالىندى

فرانسيادا ەكى ەكو-بەلسەندى كۇنى كەشە پاريجدەگى لۋۆردا قويىلعان لەوناردو دا ءۆينچيدىڭ «مونا ليزا» كارتيناسىنا سورپا بانكالارىن لاقتىردى.

كەسكىندەمە شەديەۆرى وق وتكىزبەيتىن اينەكپەن قورعالعان، سوندىقتان ول زارداپ شەككەن جوق، دەپ حابارلايدى Almaty-akshamy.kz.

Le monde باسىلىمىنىڭ مالىمەتىنشە، قورعانىس اينەگىنە سورپا شاشقاننان كەيىن، ايەلدەر قورشاۋدىڭ استىنا كىرىپ، سۋرەتتىڭ جانىنا بارىپ، ولاردىڭ ءبىرى كۋرتكاسىن شەشىپ، اينالاسىنداعىلارعا «Riposte Alimentaire» دەپ جازىلعان اق فۋتبولكاسىن كورسەتتى.

Riposte Alimentaire (Food Response) — Dernier Renovation ەكوگرۋپپاسىنىڭ تارماعى، ولار وزدەرىنىڭ بۇل ارەكەتىن كليماتتىق جانە الەۋمەتتىك دەڭگەيدە «قوعامدى تۇبەگەيلى وزگەرتۋ ماقساتىندا فرانسۋزدىق ازاماتتىق قارسىلىق ناۋقانى» رەتىندە كورسەتەدى. Riposte Alimentaire - ۇلىبريتانياداعى Just Stop Oil قوسا العاندا، الەمنىڭ 12 ەلىندەگى A22 «نارازىلىق توپتارى جەلىسىنىڭ» بولىگى. «ءبىز الەۋمەتتىك كۇيرەۋدىڭ الدىن الاتىن سوڭعى ۇرپاقپىز»، — دەلىنگەن قوزعالىس سايتىندا.

«قايسىسى ماڭىزىراق، ونەر مە، الدە دۇرىس جانە تۇراقتى تاماقتانۋ قۇقىعى ما؟ ءبىزدىڭ اۋىلشارۋاشىلىق جۇيەمىز ناشارلاعان. ءبىزدىڭ فەرمەرلەر جۇمىستارىنان ايىرىلۋدا. ءاربىر ءۇشىنشى فرانسۋز كۇن سايىن تاماقتانبايدى»، — دەپ داۋىستادى بەلسەندىلەر مۇراجاي قاۋىپسىزدىك قىزمەتكەرلەرى ولاردى قورشاپ العانعا دەيىن.

ەستەرىڭىزگە سالا كەتەيىك، نەگىزى وسى «مونا ليزاعا» 1956 جىلى دا شابۋىل جاسالعان. كورمە كەزىندە قوناقتاردىڭ ءبىرى سۋرەتكە كۇكىرت قىشقىلىن شاشىپ جىبەرىپ، ونىڭ تومەنگى بولىگىن بۇلدىرگەن.