جول ءجۇرۋ بيلەتىن قايدان الۋعا بولادى؟
الماتى قالاسىندا جاياۋ، اۆتو/تاكسيمەن جانە ۆەلوسيپەدپەن جۇرۋگە بولادى. قاتىناستىڭ اسا كەڭىنەن تاراعان ءتۇرى قوعامدىق كولىك بولىپ قالۋدا. ءىس جۇزىندە قالانىڭ كەز كەلگەن نۇكتەسىنە اۆتوبۋسپەن، تروللەيبۋسبەن جانە مەترومەن جەتۋگە بولادى. بۇل تۋرالى Almaty-akshamy.kz Open-almaty.kz-كە سىلتەمە جاساپ حابارلايدى.
ەگەر cءىز قالادا ءجيى جۇرەتىن بولساڭىز، وندا «وڭاي» جۇيەسىنىڭ جول ءجۇرۋ بيلەتىن ساتىپ العانىڭىز ءجون. ول ءتورت تۇردە ۇسىنىلعان: ءبىرىڭعاي جول ءجۇرۋ بيلەتى، الەۋمەتتىك جول ءجۇرۋ بيلەتى، ستۋدەنتتىڭ جانە وقۋشىنىڭ جول ءجۇرۋ بيلەتى.
ءبىرىڭعاي كولىك كارتاسى دەگەنىمىز نە؟
«وڭاي» ءبىرىڭعاي كولىك كارتاسى دەگەنىمىز – جول ءجۇرۋ بيلەتى بولىپ تابىلاتىن پلاستيكالىق كارتوچكا. كەز كەلگەن قوعامدىق كولىكتە كولىك ەسىگىنىڭ جانىندا ورنالاسقان تەرمينال پانەلىنەن جاي عانا وتكىزە وتىرىپ، كارتانى پايدالانۋعا بولادى. كورسەتكىش تاقتا جاسىل تۇسپەن جاندى ما؟ ءسىز جول اقىسىن تولەدىڭىز!
«وڭاي» ءبىرىڭعاي كولىك كارتاسىن مىنا جەرلەردە ساتىپ الۋعا بولادى:
- اۋەجايدا، اۆتوبۋس جانە تەمىرجول ۆوكزالدارىندا؛
- «كاراۆان» «داۋىس»، «بينگو» دۇڭگىرشەكتەرىنىڭ اگەنتتىك جەلىلەرىندە، «ازبۋكا سۆيازي»، «Akson-mobile» سالوندارىندا؛
- قوعامدىق كولىك جۇرگىزۋشىلەرىنەن؛
- مەتروپوليتەن كاسسالارىندا؛
- «وڭاي» دەگەن سيمۆوليكاسى بار فيرمالىق كەۋدەشەلەر كيگەن باقىلاۋ-تەكسەرۋ باسقارماسى قىزمەتكەرلەرىنەن.
«وڭاي» ءبىرىڭعاي كولىك كارتاسىنىڭ قۇنى - 400 تەڭگە. بۇل سوماعا قوعامدىق كولىكتە ءبىر جول ءجۇرۋدىڭ قۇنى (80 تەڭگە) جانە ەگەر ءسىز ساتىپ العان ساتتەن باستاپ جارتى جىلدىڭ ىشىندە كارتانى قايتارىپ بەرسەڭىز وتەلەتىن كولىك كارتاسىنىڭ (320 تەڭگە) كەپىل قۇنى كىرەدى.
«وڭاي» ءبىرىڭعاي كولىك كارتاسىن قايدا قايتارۋعا بولادى؟
مەكەنجايى: الماتى ق.، رىسقۇلبەكوۆ ك-سى، 33/1، «الماتى قالاسى كولىك حولدينگى» جشس-نە جۇگىنە وتىرىپ، نەمەسە «وڭاي» دەگەن سيمۆوليكامەن بەلگىلەنگەن تەمىرجول ۆوكزالدارىنداعى ارنايى كاسسالاردا كولىك كارتاسىن قايتارۋعا جانە كەپىل قۇنىن الۋعا بولادى.
وقۋشىلارعا ارنالعان
وقۋشىعا ارنالعان ارنايى كولىك كارتاسىن وقۋشى ءوزى وقيتىن مەكەمەگە (مەكتەپ، گيمنازيا، ليسەي) جۇگىنە وتىرىپ الا الادى. كارتا دەربەس، ياعني اتاۋلى بولىپ تابىلادى. كارتانى يەمدەنەتىن وقۋشى عانا ونى پايدالانا الادى. «وڭاي» مەكتەپ كارتاسى بويىنشا قوعامدىق كولىكتەردە ءبىر رەت جول ءجۇرۋ قۇنى 40 تەڭگەنى قۇرايدى. وقۋشىنىڭ كولىك كارتاسى مەكتەپتە وقۋدىڭ بۇكىل كەزەڭىنە بەرىلەدى. وقۋشىنىڭ كارتاسىن شىعارۋ قۇنى - 320 تەڭگە. جوعالعان جاعدايدا كارتانى قايتا شىعارۋ قۇنى دا 320 تەڭگەنى قۇرايدى.
ەگەر وقۋشى الماتىدا تۇرماسا جانە وقىماسا؟
الماتى قاسلاسىندا تۇرمايتىن بالالار دا وقۋشىنىڭ كولىك كارتاسىن الا الادى.
بالانىڭ اتا-اناسى، قورعانشىسى نەمەسە كامەلەتكە تولعان تۋىسى ونىڭ جەكە باسىن كۋالاندىراتىن قۇجاتپەن، بالانىڭ تۋۋ تۋرالى كۋالىگىمەن جانە 3ح4 سم فوتوسىمەن رىسقۇلبەكوۆ كوشەسى، 33/1 مەكەنجايىنا جۇگىنۋى ءتيىس. وسى مەكەنجايدا ونىڭ قايتا شىعارۋ قۇنىن تولەپ، جوعالعان كارتانى قالپىنا كەلتىرۋگە بولادى.
ستۋدەنتتەرگە ارنالعان
ەگەر ءسىز الماتى قالاسى جوعارى وقۋ ورنىنىڭ كۇندىزگى بولىمىندە نەمەسە الماتى قالاسىنىڭ تەحنيكالىق جانە كاسىپتىك ءبىلىم بەرۋ ۇيىمىندا وقيتىن بولساڭىز عانا، ءسىز ستۋدەنتتىك كولىك كارتاسىن ونلاين تارتىپتەمەسىندە الا الاسىز. كارتا دەربەس، ياعني اتاۋلى بولىپ تابىلادى. كارتانى يەمدەنەتىن ستۋدەنت قانا ونى پايدالانا الادى. «وڭاي» ستۋدەنتتىك كارتاسى بويىنشا قوعامدىق كولىكتەردە ءبىر رەت جول ءجۇرۋدىڭ قۇنى 40 تەڭگەنى قۇرايدى. ستۋدەنتتىڭ كولىك كارتاسى وقۋ ورنىندا وقىعان بۇكىل كەزەڭىنە بەرىلەدى. ستۋدەنتتىك كارتانى شىعارۋ قۇنى 320 تەڭگە. جوعالعان جاعدايدا كارتانى قايتا شىعارۋ قۇنى دا 320 تەڭگە بولادى.
جەڭىلدىك بەرىلگەن ادامدارعا ارنالعان
ءسىز «وڭاي» الەۋمەتتىك كولىك كارتاسىن قولىڭىزدا جەكە باسىڭىزدى كۋالاندىراتىن قۇجات جانە جەڭىلدىكتى كۋالاندىراتىن قۇجات (زەينەتكەر كۋالىگى، مۇگەدەكتىگى تىركەلگەن جەرى بويىنشا ەمحانادا مەديسينالىق-الەۋمەتتىك ساراپتامامەن بەرىلگەن مۇگەدەكتىك تۋرالى انىقتاما جانە مەكەنجاي انىقتاماسى) بولعان جاعدايدا الماتى ق. الەۋمەتتىك باعدارلامالار جانە جۇمىسپەن قامتۋ باسقارماسىنىڭ اۋداندىق بولىمدەرىندە الا الاسىز. جەڭىلدىك كارتاسى دەربەستەندىرىلگەن جانە يەسىنىڭ فوتوسى مەن مالىمەتتەرىن قامتيدى. ول بويىنشا جول ءجۇرۋ قۇنى 40 تەڭگەنى قۇرايدى. كارتانى شىعارۋ قۇنى 320 تەڭگە. جوعالعان جاعدايدا قايتا شىعارۋ قۇنى دا 320 تەڭگە بولادى.
ءبىرجولعى جول ءجۇرۋ قۇنى:
- جاسى بويىنشا زەينەتكەرلەر، كوپ بالالى (18 جاسقا دەيىنگى 4 نەمەسە ودان دا كوپ بالاسى بار) انالار ءۇشىن 40 تەڭگەنى قۇرايدى؛
- 75 جاستان اسقان زەينەتكەرلەر، ۇوس قاتىسۋشىلارى مەن مۇگەدەكتەرى، سونداي-اق ولارعا تەڭەستىرىلگەن ادامدار، 18 جاسقا دەيىنگى مۇگەدەك بالالار جانە 1، 2 توپتاعى مۇگەدەكتەر ءۇشىن تەگىن.
كارتادا تەڭگەرىمدى قالاي تولتىرۋعا بولادى؟
«وڭاي» كارتاسىنىڭ تەڭگەرىمىن ۇيالى بايلانىستىڭ تولەم تەرمينالدارى، ءموبيلدى قوسىمشالار ارقىلى جانە بانكتەردىڭ ينتەرنەت-پورتالدارى ارقىلى تولتىرۋعا بولادى.
سونىمەن قاتار Beeline ابونەنتتەرى 2020 قىسقا نومىرگە SMS حابارلاما ارقىلى جانە money.beeline.kz تولەم سەرۆيسىنىڭ كومەگىمەن تەڭگەرىمدى تولتىرا الادى.
تولىق اقپاراتتى رەسمي سايتىنان الۋعا بولادى، مۇندا ءسىز سونداي-اق تولىقتىرۋ مەن ساپارلار تاريحىن قاراي الاسىز.
ەرەجەلەردى بۇزۋ فاكتىسى بويىنشا قايدا جۇگىنۋگە بولادى؟
ەگەر دە كوندۋكتور نەمەسە جۇرگىزۋشى ەرەجەلەردى بۇزىپ، جول اقىسىن قولما-قول تالاپ ەتسە، ءسىز اتالعان اۆتوبۋستىڭ مەملەكەتتىك ءنومىرىن جازىپ الىپ، «وڭاي» كارتاسىنىڭ قولدانۋشىلارىنا قىزمەت كورسەتۋ ورتالىعىنا» +7 (727) 397 01 91 تەلەفونى بويىنشا حابارلاسۋىڭىزعا بولادى. سونىمەن قاتار، ەگەر دە تەرمينال ىستەن شىقسا، ءسىز جول اقىسىن تولەمەۋگە قۇقىلىسىز.
سارالانعان تاريف
الماتى قوعامدىق كولىگىندە 1 تامىزدان باستاپ سارالانعان تاريف ەنگىزىلگەن. ەندى قولما-قول تولەۋ كەزىندە جول ءجۇرۋ قۇنى 150 تەڭگەنى قۇرايدى. 80 تەڭگە كولەمىندەگى جول ءجۇرۋ باعاسى ساقتالادى، ەگەر جولاۋشى "وڭاي" ءبىرىڭعاي كولىكتىك كارتوچكاسىمەن نەمەسە SMS ارقىلى نەمەسە بانكتىك كارتا ارقىلى تولەيتىن بولسا.