ون مىڭ دانا تارالىممەن مەرەيتويلىق ماركا اينالىمعا شىقتى

قازاقستان رەسپۋبليكاسىنىڭ اۋماعىندا «قازاقستان رەسپۋبليكاسىنىڭ بىرىككەن ۇلتتار ۇيىمىنا مۇشە بولۋىنىڭ 30 جىلدىعىنا» وراي «ەستەلىك جانە مەرەيتويلىق كۇندەر» سەرياسىنىڭ ارنايى پوشتالىق ماركاسى اينالىمعا ەنگىزىلدى، دەپ حابارلايدى اlmaty-akshamy.kz.

ماركانى «قازپوشتا» اق بۇۇ-نىڭ قازاقستانداعى وكىلدىگى مەن قازاقستان رەسپۋبليكاسىنىڭ سىرتقى ىستەر مينيسترلىگى بىرلەسىپ شىعارعان.

«ءبىزدىڭ كومپانيا قازاقستاننىڭ بۇۇ-عا مۇشەلىگىنىڭ 30 جىلدىعى سياقتى ايتۋلى وقيعانىڭ قۇرمەتىنە ەستەلىك پوشتا ماركاسىن اينالىمعا شىعارعانىنا قۋانىشتى. وسى ماركا ەلىمىزدىڭ الەمدىك قاۋىمداستىقتاعى ءرولىنىڭ تاماشا دالەلى بولادى دەپ ويلايمىن. بيىل «ەستەلىك جانە مەرەيتويلىق كۇندەر» سەرياسى اياسىندا "قازپوشتا" قازاقستاننىڭ يۋنەسكو، اوسشك سياقتى حالىقارالىق ۇيىمدارعا مۇشەلىگىنىڭ 30 جىلدىعىنا جانە قازاقستاننىڭ ماتەريالدىق ەمەس مۇرانى ساقتاۋ تۋرالى كونۆەنسياعا قوسىلۋىنىڭ 10 جىلدىعىنا ارنالعان ماركالار شىعاردى. سونىمەن قاتار ەلىمىزدە پوشتا اينالىمىندا بۇۇ-نىڭ 50 جانە 60 جىلدىعىنا وراي شىعارىلعان ماركالار قولدانىلادى»، - دەدى «قازپوشتا» اق باسقارما ءتوراعاسى اسەل جاناسوۆا.

ولشەمى 26 ح 29،6 مم پوشتا ماركاسى 10 000 دانا تارالىممەن شىعارىلدى. ماركا پاراعى 8 ماركادان تۇرادى. پاراق ولشەمى 135 x 70 مم. پوشتا ماركاسىنىڭ نومينالى – 700 تەڭگە. ماركالار ۋلتراكۇلگىن بوياۋمەن جانە لاكپەن قورعالعان. سۋرەتشىسى – ەلنارا باينازاروۆا.

بۇۇ-نىڭ قازاقستانداعى باسشىسى ميكاەلا فريبەرگ-ستوري: «ماركا كەسكىندەمەسىنىڭ نەگىزى رەتىندە دومبىرانىڭ تاڭدالۋى كەزدەيسوق ەمەس، ويتكەنى قازاقتىڭ ءداستۇرلى دومبىرا كۇيى يۋنەسكو ماتەريالدىق ەمەس مادەني مۇرانىڭ رەپرەزەنتاتيۆتى تىزىمىنە ەنگىزىلگەن. ءبىز قازاقستاننىڭ وسى وتىز جىل ىشىندە تۇراقتى دامۋ جونىندەگى ىس-ارەكەتىن قۇپتايمىز. ەستەلىك پوشتا ماركاسىنىڭ شىعارىلىمى قازاقستاننىڭ سىرتقى ساياساتى تاريحىنداعى ماڭىزدى بەلەس جانە تۇراقتى دامۋ ماقساتتارىنا بەيىمدىگى تۋرالى قوعام حاباردارلىعىن ارتتىرۋدىڭ بەلگىسى بولىپ تابىلادى»، - دەپ اتاپ ءوتتى.

بىرىككەن ۇلتتار ۇيىمى دامۋدىڭ بولاشاق جوسپارلارى مەن ۇكىمەتتىڭ تۇراقتى دامۋعا دەگەن قارقىندى ۇمتىلىسى تۋرالى كوزقاراستى دامىتۋ ءۇشىن قازاقستانعا ارنالعان قولداۋىن تەرەڭدەتۋدە. بۇۇ-نىڭ قازاقستانداعى جۇيەسى قۇندىلىقتارعا، ادام قۇقىقتارىنا نەگىزدەلگەن سەنىمدى سەرىكتەس بولىپ قالا بەرەدى. ۇيىم جۇمىسى مەملەكەت پەن قوعامداعى سەرىكتەستەرگە باسقارۋدىڭ ەڭ قاجەتتى كەڭەستەرىن، تەحنيكالىق كومەك پەن عالامدىق جەلىلەرگە قول جەتكىزۋگە باعىتتالعان.