ەكى ەسىگى بار كولىكتەر دە تاكسيدەن شەتتەتىلەدى.
ىشكى ىستەر ءمينيسترىنىڭ ورىنباسارى يگور لەپەحا ءرولى وڭ جاقتا ورنالاسقان كولىكتەرگە تاكسي قىزمەتىمەن اينالىسۋعا تىيىم سالىنعانىن ەسكە سالدى، دەپ حابارلايدى aqshamnews.kz
لەپەحانىڭ ايتۋىنشا، كولىك ءمينيسترىنىڭ ارنايى بۇيرىعى بار. وعان سايكەس، ءرولى وڭ جاقتا ورنالاسقان كولىكتەرمەن جولاۋشىلاردى تاسىمالداۋعا تىيىم سالىندى. ءبىراق ونداي ادامداردى جازاعا تارتۋ قيىن.
"ولاردى پوليسيا توقتاتقاندا، سالونداعى ادامدار تۋىستارىم نەمەسە دوستارىم دەي سالادى، تويعا بارا جاتىر دەيدى. ول ادامدار دا ۇندەمەي وتىرادى. ءبىز ونداي كولىكتەردىڭ ادام تاسىمالداۋمەن اينالىسىپ جۇرگەنىن بىلەمىز، ءبىراق جاۋاپقا تارتا الماي جاتامىز"، - دەدى لەپەحا.
ونىڭ ايتۋىنشا، قازىرگى كەزدە InDrive پەن ياندەكس تاكسي ارنايى مەموراندۋمعا قول قويدى. سونىڭ اياسىندا تاكسي اگرەگاتورلارى ءرولى وڭ جاقتا ورنالاسقان كولىك يەلەرىمەن كەلىسىمشارت جاسامايدى. ەكى ەسىگى بار كولىكتەر دە شەتتەتىلەدى.
"بۇل مەموراندۋمدار 1 قاڭتاردان باستاپ كۇشىنە ەنەدى. زاڭعا دا ءتيىستى وزگەرىستەر ەنگىزىلدى. سول سەبەپتى 1 قاڭتاردا باستاپ ءبىز وسى ماسەلەگە قاتىستى شارالاردى كۇشەيتەمىز"، - دەدى ءمينيستردىڭ ورىنباسارى.