كونستيتۋسيالىق كوميسسيانىڭ ءۇشىنشى وتىرىسىندا ادام قۇقىقتارى جونىندەگى ۋاكىل ارتۋر لاستايەۆ ادام مەن ازاماتتىڭ نەگىزگى قۇقىقتارى مەن بوستاندىقتارىن قورعاۋدى كۇشەيتۋگە قاتىستى ۇسىنىستار جونىندە ءسوز سويلەدى.
ول ءومىر ءسۇرۋ قۇقىعىن ءابسوليۋتتى قۇقىق رەتىندە بەكىتۋ جونىندەگى باستامالاردى قولداۋ قازىرگى قازاقستاندىق مەملەكەتتىڭ ماڭىزدى قۇندىلىقتارىن كورسەتەتىنىن اتاپ ءوتتى.
«ءبىز مۇمكىندىگىنشە ءومىر ءسۇرۋ قۇقىعىن ءابسوليۋتتى ەتۋگە ءوتىنىش بىلدىردىك. بۇعان كوپتەگەن بەدەلدى ساراپشىلار، سونىڭ ىشىندە حالىقارالىق دەڭگەيدەگىلەر دە: “جارايسىڭدار!” دەپ ايتادى»، – دەدى لاستايەۆ.
ونىڭ ايتۋىنشا، بۇل قۇقىقتىڭ ءابسوليۋتتى سيپاتىن كونستيتۋسيادا بەكىتۋ ءولىم جازاسىنان باس تارتۋدى عانا ەمەس، سونداي-اق كەز كەلگەن جاعدايدا – اپات كەزىندە، اۋرۋ حالدە نەمەسە شابۋىل جاسالعاندا – ازاماتتاردىڭ ءومىرىن مىندەتتى تۇردە قورعاۋدى بىلدىرەدى.
لاستايەۆ سونداي-اق ءادىل سوتقا كەپىلدىكتەردى ادامنىڭ نەگىزگى قۇقىقتارى مەن بوستاندىقتارى بولىمىنە كوشىرۋ تۋرالى ۇسىنىستار قازاقستاننىڭ ۇلتتىق قۇندىلىقتارى مەن تاريحي تاجىريبەسىنە ساي كەلەتىنىن اتاپ ءوتتى. ول ءادىل سوت تورەلىگىنىڭ قاعيداتتارى بيلەر سوتى داۋىرىنەن بەرى قالىپتاسىپ، ازاماتتاردىڭ ار-نامىسى مەن قادىر-قاسيەتىن، جەكە بوستاندىعىن جانە جەكە ومىرىنە قول سۇعىلماۋشىلىقتى ءداستۇرلى تۇردە قورعاپ كەلگەنىن ەسكە سالدى.
«بۇل قاعيداتتاردى نەگىزگى ادام قۇقىقتارىنىڭ قاتارىنا ەنگىزە وتىرىپ، ءبىز كونستيتۋسيادا ۇلتتىق قۇندىلىقتارىمىزدى ءارى تاريحي تاجىريبەمىزدى بەينەلەيمىز»، – دەدى ومبۋدسمەن.
سونىمەن قاتار، لاستايەۆ كونستيتۋسيانىڭ جەتىنشى ءبولىمىنىڭ اتاۋىن وزگەرتۋ باستاماسىن قولداپ، بۇل وزگەرىستەر ادام قۇقىقتارىن قورعاۋعا باسىمدىق بەرۋدى كۇشەيتەتىنىن اتاپ ءوتتى. ول جاڭارتىلعان كونستيتۋسيا رەداكسياسىندا وسى نورمالاردى بەكىتۋ قازاقستان ءۇشىن ادام، ونىڭ قۇقىقتارى مەن بوستاندىقتارى – ەڭ جوعارى قۇندىلىق ەكەنىن راستايتىنىنا سەنىم ءبىلدىردى.