اتتان قۇلاعان سەگىز جاسار بالانى الماتى قالاسى جانە وبلىس دارىگەرلەرى امان الىپ قالدى، دەپ حابارلايدى almaty-akshamy.kz
حاميت وتكەن جىلدىڭ قاراشا ايىندا الماتى وبلىسىندا اتقا ءمىنىپ قىدىرعاندا قۇلاعان. سودان ءتورت اي بويى قايتا-قايتا ءومىر مەن ءولىم اۋزىندا بولعان.
ەمدەلۋ بارىسىندا حاميت جانە ونىڭ اتا-اناسى بىرنەشە اۋرۋحانادا بولدى، ونىڭ جاراقاتى ەڭ تاجىريبەلى دەگەن دارىگەرلەردىڭ ءوزىن تاڭ قالدىردى: اۋىر ارالاس جاراقات، اۋىر جابىق باسسۇيەك-مي جاراقاتى، مي جانە مي باعانىنىڭ سوعىلۋى مەن زاقىمدانۋى، باس سۇيەك كۇمبەزىنىڭ سىنۋى، كوز الماسىنىڭ سوعىلۋى، كەۋدە جانە قۇرساق مۇشەلەرىنىڭ سوعىلۋى.
العان جاراقاتتان ءقاۋىپ وتكەننەن كەيىن بالانىڭ تىنىس الۋى قيىنداي ءتۇستى. بالالار شۇعىل مەديسينالىق كومەك كورسەتۋ ورتالىعىنىڭ دارىگەرلەرى بالاعا جاراقات سالدارىنان پايدا بولعان تراحەيا ستەنوزى دەگەن دياگنوز قويدى. بالاعا تراحەوستوميا، بىرنەشە رەت برونحوسكوپيا جانە تراحەيانى سۇمبىلەۋ جاسالعانىنا قاراماستان، بالا تۇنشىعىپ قالا بەردى، جوعارىدا اتالعان پروسەدۋرالاردىڭ ءبارى ەش ناتيجە بەرمەدى.
بالا بىرنەشە رەت رەانيماسياعا ءتۇستى، تىنىس الۋ جەتكىلىكسىزدىگىنىڭ سالدارىنان ونىڭ جاعدايى وتە اۋىر دەپ باعالاندى. وسىلايشا بالالار جەدەل مەديسينالىق كومەك كورسەتۋ ورتالىعىنىڭ دارىگەرلەرى العاش رەت تراحەيانىڭ ستەنوزدىق بولىگىن رەزەكسيالاۋ جانە تراحەياعا پلاستيكالىق وتا جاساۋ شەشىمىن قابىلدادى.
«ەمدەۋ ناتيجە بەرمەدى جانە شۇعىل شارا قابىلداۋ قاجەت بولدى. كەزەكتى كونسيليۋمدا تراحەيانىڭ ستەنوزدىق ايماعىن رەزەكسيالاۋ جانە تراحەياعا پلاستيكالىق وتا جاساۋدى شەشتىك. ورتالىقتا بۇعان دەيىن مۇنداي وتا جاساماعانبىز، بۇل الماتىدا بالاعا جاسالعان العاشقى تراحەيالىق پلاستيكالىق وتا بولدى! بالانى الدىن-الا پروفەسسور ك.ت. تۋرسىنوۆ، جاق-بەت حيرۋرگى ا.ە. ۋرازايەۆا، كەۋدە جانە ءىرىڭدى حيرۋرگيا ءبولىمىنىڭ مەڭگەرۋشىسى س.ا. مىرزاحمەت قاراپ تەكسەردى. وتانى اۋرۋحانانىڭ جەتەكشى ماماندارى جۇرگىزدى، وتا ەكى ساعاتقا سوزىلدى. حيرۋرگتار تراحەيانى قالپىنا كەلتىردى، بالا ءوزى دەم الاتىن بولدى»، - دەيدى الماتى بالالار جەدەل مەديسينالىق كومەك كورسەتۋ ورتالىعى ديرەكتورىنىڭ ورىنباسارى ديماش رۋزۋددينوۆ.
2024 جىلدىڭ 14 اقپانى سەگىز جاسار حاميت ءۇشىن ايتۋلى كۇن - ول تولىعىمەن قالپىنا كەلدى.
وتانى حيرۋرگ ساماتبەك مىرزاحمەت، انەستەزيولوگ ايگەريم كۋليمبەتوۆا، اسسيستەنتتەر جاق-بەت حيرۋرگى ايدا ۋرازايەۆا، بالالار حيرۋرگى جالگاس كۋنيازوۆ جاسادى.
«مەن وسى اۋرۋحانانىڭ حيرۋرگتارى مەن اكىمشىلىگىنە وتا جاساۋ تۋرالى شەشىم قابىلداعانى ءۇشىن شەكسىز العىسىمدى بىلدىرەمىن. ءبىزدىڭ بالامىز حاميت اۋىر جاعدايدا، ءوز بەتىمەن دەم الا الماعان كۇيدە ءتۇستى. ۇلىم وسىندا، الماتىدا تراحەوپلاستيكادان ءوتتى، شەتەلدەن اۋرۋحانا ىزدەۋدىڭ قاجەتى بولعان جوق. مۇنداي وتا بۇرىن-سوڭدى بۇل جەردە جاسالماعان ەكەن. دەگەنمەن، دارىگەرلەردىڭ كاسىبي شەبەرلىگىنىڭ ارقاسىندا ءبارى ويداعىداي ءوتتى. ءتورت اي ۇزاق ەمدەلگەننەن كەيىن حاميت ءقازىر ۇيدە، مەكتەپكە بارىپ ءجۇر جانە جاقسى باعا الىپ جاتىر. ءبىزدى تاستاماي، قولدان كەلگەننىڭ ءبارىن ىستەگەن دارىگەرلەرىمىزگە راحمەت»، - دەپ قوستى بالانىڭ اكەسى مۇحان.