اۆستراليالىق نيك ۆۋيچيچ سيرەك كەزدەسەتىن سيندروممەن – ەكى قولى، ەكى اياعى جوق كۇيىندە تۋعان. ءبىراق اقىل- ەسى ساۋ. سوندىقتان دا اتا-اناسىنىڭ وتىنىشىمەن مۇگەدەكتەرگە ارنالعان ەمەس، كادىمگى مەكتەپتە ءبىلىم الۋعا مۇمكىندىك العان.
ول تۋعان كەزدە دارىگەرلەر اتا-اناسىنا «وتە وكىنىشتى، سابيلەرىڭىز ەشقاشان جۇرە المايدى» دەگەن ەكەن. ومىرگە قۇشتار نيك بۇل ۇكىمدى جوققا شىعاردى، ءتىپتى اياق تۇسىنداعى كىشكەنە ەكى ساۋساعىنىڭ كومەگىمەن ءتىسىن ىسۋدى دا ءوزى ۇيرەنە باستاعان.
ارينە، وعان قول-اياعى ءبۇتىن سىنىپتاستارىمەن بىرگە وقۋ اسا وڭاي بولا قويماعان. 10 جاسىندا سىنىپتاستارىنىڭ مازاعىنا، كەمسىتۋىنە شىداماي، سۋعا باتىپ ولگىسى كەلگەن كورىنەدى. ءبىراق ونى بۇل رايىنان اتا-اناسى قايتارعان. ول قول- اياقسىز-اق سەرفينگپەن اينالىستى، سكەيتبورد تەبە باستادى. بوس ۋاقىتىندا گولف ويناعاندى ۇناتاتىن. 19 جاسىنان باستاپ جاسوسپىرىمدەر، ستۋدەنتتەر الدىندا ءوزى تۋرالى اڭگىمەلەپ، ولاردى ءومىردى سۇيۋگە ۇندەي باستاعان. ونىڭ وراتورلىق قابىلەتى ءدال وسى كەزدە اشىلعان سەكىلدى.
اياق جاعىنداعى كىشكەنە ساۋساقتارىنىڭ كومەگىمەن كومپيۋتەردە مينۋتىنا 45 ءسوز تەرۋ ارقىلى كىتاپ جازا باستاعان. بەرتىن كەلە ءوزىنىڭ ءومىر جولى، كەزدەسكەن قيىندىقتارى مەن قىزىق-قۋانىشتارى جانە قانداي قيىندىق بولسا دا مويىماعان مۇگەدەك جاندار تۋرالى باياندايتىن «جيزن بەز گرانيس»، «نەۋدەرجيمىي»، «ليۋبوۆ بەز گرانيس»، «بۋد سيلنىم» سىندى كىتاپتارىن جازىپ شىعارعان. ول ەكى جوعارى وقۋ ورنىن بىتىرگەن، بۋحگالتەر جانە قارجىگەر دەگەن ەكى ماماندىعى بار. قازىرگى تاڭدا – ميلليونداعان ادامعا شابىت سىيلاۋشى موتيۆاتور، وراتور جانە مەسەنات. الەمنىڭ 60-قا جۋىق ەلىن ارالاپ، مەكتەپتەر مەن ۋنيۆەرسيتەتتەردە شەبەرلىك ساباقتارىن جۇرگىزىپ، ومىردەن باز كەشىپ جۇرگەن كوپتەگەن جاننىڭ ءجۇرەگىنە ءۇمىت وتىن جاعا بىلگەن مەيىرىمدى ادام.
نيكتىڭ بۇگىندە سۇيىكتى ايەلى، ءتورت بالاسى بار. «مەن دە، مەنىڭ ايەلىم دە كەدەي وتباسىنان شىققانبىز. مەنىڭ اينامنىڭ الدىندا اش، ءبىراق جىميىپ تۇرعان افريكالىق جەتىم بالانىڭ سۋرەتى ءىلىنىپ تۇر. مەن سول سۋرەتكە قاراعان سايىن ومىردە قانداي قيىندىق بولسا دا شۇكىر ەتە ءبىلۋ كەرەكتىگى، ەسەيگەن كەزدە جەتىمدەرگە قولۇشىن سوزعىم كەلەتىنى تۋرالى ويلايتىنمىن. 19 جاسقا تولعاندا افريكاداعى جەتىم بالالارعا 30 مىڭ دوللار اۋداردىم. مەن بۇل ماقساتقا بىردەن جەتپەسەم دە، بىرتىندەپ جەتتىم. بۇگىندە زايىبىم ەكەۋمىز 15 جەتىم بالاعا تۇراقتى تۇردە دەمەۋشىلىك جاسايمىز. مەنىڭ بالالارىم ول بالالارعا حات جازادى. ءوز بالالارىمدى قايىرىمدى، مەيىرىمدى بولۋعا ۇيرەتەمىن. ءار ادام وزىنەن باستاۋى كەرەك!»، – دەيدى ول.