كوروناۆيرۋس ينفەكسياسىنىڭ جاڭا شتامىنىڭ پايدا بولۋىنا وراي ەلىمىزدە 3 جەلتوقساننان باستاپ شەكتەۋ ءىس-شارالارى كۇشەيەدى. بۇل تۋرالى ۇكىمەت وتىرىسىندا ءمالىم بولدى، دەپ حابارلايدى almaty-akshamy.kz
ق ر دەنساۋلىق ساقتاۋ ءبىرىنشى ۆيسە-مينيسترى مارات شورانوۆتىڭ ايتۋىنشا، كوروناۆيرۋستىق ينفەكسيانىڭ «وميكرون» شتامىنىڭ جاڭا نۇسقاسىنىڭ پايدا بولۋىنا بايلانىستى، ونى ەل اۋماعىنا اكەلۋگە جول بەرمەۋ ماقساتىندا ۆەدومستۆوارالىق كوميسسيادا وسى جىلدىڭ 3 جەلتوقسانىنان باستاپ مىناداي شەكتەۋ ءىس-شارالارىن ەنگىزۋ تۋرالى شەشىم قابىلداندى.
- ءبىرقاتار افريكا ەلدەرىنىڭ ازاماتتارىنا قازاقستانعا ساپار شەگۋىنە شەكتەۋ قويىلماق. اتاپ ايتساق، وڭتۇستىك افريكا، بوتسۆانا، لەسوتو، ناميبيا، زيمبابۆە، موزامبيك، ماداگاسكار جانە ت.ب. ەلدەردىڭ ازاماتتارى ءۇشىن قازاقستاننىڭ شەكاراسى جابىلادى.
- ۆيرۋستىڭ جاڭا شتامىنان ساقتانۋ ماقساتىندا «وميكرون» انىقتالعان ەلدەردەن كەلەتىن ازاماتتاردىڭ ۆاكسينا العانىنا قاراماستان، مىندەتتى تۇردە پتر تەست انىقتاماسى تالاپ ەتىلەدى. بۇل ەلدەردىڭ قاتارىندا يزرايل، چەحيا، نيدەرلاند، بەلگيا، ۇلبىريتانيا، يتاليا، گەرمانيا، اۆستراليا، كانادا جانە ەگيپەت بار. وعان قوسا، ۆەدوسمتۆوارالىق كوميسسيانىڭ شەشىمىمەن اتالعان ەلدەردەن ۇشىپ كەلگەن ازاماتتار بۇدان بىلاي جەتى كۇندىك ءۇي كارانتينىنە جاتقىزىلادى.
- كوروناۆيرۋستىڭ "وميكرون" شتامىنىڭ الدىن الۋ ءۇشىن ەگيپەتتەن كەلەتىن اۋە رەيستەرى ۋاقىتشا توقتاتىلادى.
ايتا كەتەيىك، سانيتارلىق-ەپيدەميولوگيالىق كوميتەتىنىڭ دەپارتامەنتتەرى، شەتەلدەن كەلگەن ازاماتتار تۋرالى اقپاراتتى جەرگىلىكتى اتقارۋشى ورگاندارعا ۋاقتىلى بەرۋدى، ال اكىمدىكتەر بۇل تۇلعالاردى ەمحانا دەڭگەيىندە قاشىقتىقتان باقىلاۋدى قامتاماسىز ەتۋى قاجەت.