"وميكرون" شتامىمەن اۋىرۋ كوپ جاعدايدا جەڭىل جانە سيمپتومسىز وتەدى. بۇل تۋرالى بۇگىن ۇكىمەت وتىرىسىندا ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«بۇگىن ەلىمىزدە بارلىعى 21 مىڭ ينفەكسيالىق توسەك-ورىن اشىلدى. ونىڭ 33 پايىزىندا ناۋقاستار جاتىر. رەانيماسيالىق توسەك-ورىن - 2 مىڭنان استام، ونىڭ 16 پايىزى بوس ەمەس. رەزەرۆتە 30 مىڭ ينفەكسيالىق جانە 3 مىڭ رەانيماسيالىق ورىندار بار. وڭىرلەر بويىنشا ستاسيونارلىق كومەك ۇيىمداستىرۋ ماسەلەسى تۇراقتى باقىلاۋعا الىنعان»، - دەدى مينيستر.
ونىڭ اتاپ وتۋىنشە، كوروناۆيرۋستىڭ "وميكرون" شتامىمەن اۋىرۋ كوپ جاعدايدا جەڭىل جانە سيمپتومسىز وتەدى.
«قىسقا 2 كۇندىك جۇعۋ كەزەڭىمەن سيپاتتالادى. اۋرۋدىڭ ەسەلەپ كوبەيۋى دە سودان. اۋرۋدىڭ العاشقى بەلگىلەرى - تۇماۋ مەن جەدەل رەسپيراتورلىق اۋرۋلارداعى سياقتى «سۋىق تيۋ» كورىنىسى، ياعني قىزۋ، السىزدىك، باس اۋرۋى، جوتەل. بۇگىنگى جاعداي بويىنشا اۋرۋلاردىڭ 80 پايىزى، ياعني 78 629 اۋرۋ امبۋلاتوريالىق ەم الۋدا. سوڭعى اپتادا انىقتالعان جاعدايلاردىڭ ىشىندە اۋرۋحاناعا جاتقىزىلعان ادامداردىڭ ۇلەس سالماعى - 19،5 پايىز. ستاسيونارعا اۋرۋدىڭ ورتا جانە اۋىر دارەجەسىمەن اۋىراتىن پاسيەنتتەر ءتۇسىپ جاتىر. بۇل رەتتە ەمدەۋگە جاتقىزىلعان ادامداردىڭ ىشىندە اۋىر جانە وتە اۋىر پاسيەنتتەردىڭ ۇلەسى – 5 پايىز»، - دەدى اجار عينيات.