COVID-19 تاۋلىكتىك سىرقاتتانۋدىڭ 60 پايىزدان استامى ءۇش ايماقتا تىركەلدى. بۇل تۋرالى بۇگىن ۇكىمەت وتىرىسىندا ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«ەلىمىزدە COVID-19-بەن تاۋلىكتىك سىرقاتتانۋ كورسەتكىشىنىڭ 60 پايىزدان استامى ءۇش ايماقتا تىركەلدى. نۇر-سۇلتان قالاسىندا اۋرۋ 32 ەسە ءوسىپ، بۇل رەتتە تەستىلەۋ دەڭگەيى ەل بويىنشا ەڭ جوعارى جانە تاۋلىگىنە 10 مىڭنان استام تەستى قۇراپ وتىر. ءبىراق، باس قالادا حالىقتى ۆاكسينالاۋ قارقىنى 1،5 ەسە جانە ريەۆاكسيناسيا قارقىنى 4 ەسە تومەن»، - دەدى اجار عينيات.
ونىڭ ايتۋىنشا، الماتى قالاسىندا SARS-CoV2 اۋرۋى 8 ەسە ءوستى.
تەستىلەۋ دەڭگەيى قالپىنا كەلتىرىلىپ، وسى جىلعى قاڭتاردان باستاپ 3،5 ەسە ارتتى. دەگەنمەن، ۆاكسيناسيا قارقىنى 1،6 ەسە جانە ريەۆاكسيناسيا قارقىنى 3 ەسە تومەندەپ وتىردى.
«قاراعاندى وبلىسىندا سىرقاتتانۋ 9 ەسە ءوستى، ال ۆاكسيناسيا قارقىنى 3 جانە ريەۆاكسيناسيا قارقىنى 3،5 ەسە تومەندەدى. وتكەن اپتانىڭ سوڭىندا نۇر-سۇلتان قالاسى مەن قاراعاندى وبلىسىنىڭ جەرگىلىكتى اتقارۋشى ورگاندارى باسشىلىعىنىڭ قاتىسۋىمەن اۋرۋ وسىمىنە دايىندىقتى باعالاۋ جانە قابىلداناتىن شارالار بويىنشا رەسپۋبليكالىق شتاب وتكىزىلىپ، ۇسىنىم بەرىلدى. ءاربىر وڭىرمەن جۇمىس جالعاسادى»، - دەدى مينيستر.