يسلام بايرامۋكوۆ، ەركىن كۇرەستەن سيدنەي وليمپياداسىنىڭ كۇمىس جۇلدەگەرى:
ءبىر نارسەنى ءتۇسىنۋ كەرەك. باياعىدا بوكس قانداي ەدى؟ ءقازىر قانداي جاعدايعا ۇشىرادى؟ بۇگىندە حالىقارالىق وليمپيادا كوميتەتى (حوك) حالىقارالىق بوكس فەدەراسياسىن شەتتەتىپ تاستاپ، وزدەرى وتكىزىپ جاتىر. وعان فەدەراسيا مۇشەلەرىن جىبەرمەيدى. سوندىقتان توكيونى دا، ەندى پاريج وليمپياداسىن دا وزدەرى قولىنا الدى. ەشقانداي داۋ-داماي، ورەسكەل دۇنيەلەردى ەستىپ تە، كورىپ تە جاتقام جوق. ويتكەنى، جەكە كوزقاراسىم بويىنشا ءبارىن تازا وتكىزىپ جاتقان سياقتى.
ارينە، كەمشىلىكتەر جوق ەمەس. دەگەنمەن، حوك ۇيىمداستىرعان ەكىنشى وليمپيادادان اسىپ بارا جاتقان قاتەلىك كورمەدىم. تورەشىلەر جۇمىسىن شىنايى، ءادىل اتقارىپ وتىر. جانكۇيەرلەر دە بوكسشىلاردىڭ كوبى وليمپيادا چەمپيونى بولىپ ورالعانعا ۇيرەنىپ قالعان. شىن مانىندە، وسى وليمپيادادان كەيىن بوكس سالاسىنىڭ ماماندارىنان كادىمگى زەرتتەلگەن تالداۋ كۇتۋ كەرەك.
ءقازىر بۇكىل الەم دامىپ جاتىر. بالكىم، بوكسشىلاردىڭ دايىندىق جۇمىسىن، جاتتىعۋ تاكتيكاسىن، فەدەراسيانىڭ رەتتەۋ جارىسىن باسقاشا قاراستىرۋ كەرەك شىعار. كەلەسى وليمپيادادا وسىنداي قاتەلىكتەر بولماس ءۇشىن قازىردەن باستاپ كوميسسيا قۇرىپ، ءبارىن زەرتتەپ، اۋىستىراتىن ادامداردى اۋىستىرىپ، قوياتىن ادامدى قويىپ، جاڭاشا باعدارلاما جاساپ، دۇرىس باعىتتا جۇمىس ىستەۋ كەرەك. تاۋەلسىز مامانداردىڭ دا پىكىرىن تىڭداپ، سوڭىنان شەشىم قابىلداۋ قاجەت. مەن بوكس ماماندارىمەن، تورەشىلەرمەن پىكىرلەسىپ وتىرامىن. ەشقانداي دا بۇرا تارتۋ جوق. ءبىراق مۇحامەدسابىردىڭ جەكپە-جەگىندە شامالى كورىندى. بوكستىڭ مامانى ەمەسپىن عوي. وسى سپورتتىڭ ماماندارىنان سۇراسام، «تەڭبە-تەڭ بولدى، تورەشىلەر سولاي شەشتى» دەيدى. قازاقستاننىڭ ۇلتتىق وليمپيادا كوميتەتى شاعىم تۇسىرگەنمەن «تورەشىلەر كەمشىلىك جىبەرىپتى» دەپ، ءارى كەتسە تورەشىلەرىن جازالايدى، ءبىراق جەكپە-جەكتىڭ ناتيجەسىن وزگەرتپەيدى. بۇل ايدان انىق قوي. جىگىتتەر وليمپياداعا نە ءۇشىن بارعانىن بىلەدى. ماقسات انىق، جوسپار بار. بار بولعانى ءساتى تۇسپەدى. بۇيىرماعان دۇنيە دەپ قانا قابىلداۋ كەرەك.
"Nege.kz" سايتىنان ىقشامدالىپ الىندى