وليمپيادا ۇلكەن تاجىريبە بولدى

سپورت - ونەر!

ۇلتتىق وليمپيادا كوميتەتىنىڭ سپورتتىق قۇزعا ورمەلەۋدەن توكيو وليمپياداسىندا سىنعا تۇسكەن ريشات حايبۋللين 11ء-شى ورىن يەلەنگەن بولاتىن. سپورتشىنىڭ اكەسى ءارى جاتتىقتىرۋشىسى رينات حايبۋللين ۇلىنىڭ العاشقى وليمپياداداعى كورسەتكىشىن قورىتىندىلادى،  دەپ حابارلايدى Almaty-akshamy.kz. 

«نەگىزى، ءبىز «جىلدامدىق» بويىنشا 1-2 ورىن يەلەنۋدى كوزدەدىك. ريشاتتىڭ بۇعان الەۋەتى جەتەتىن ەدى. ال فينالدا 5-7 ورىن ارالىعىنا ەنۋدى ماقسات ەتتىك. الايدا، جىلدامدىقتان سوڭ ءتورتىنشى ورىندا قالدىق تا، قورىتىندى ەسەپتە 11ء-شى ورىنعا سىرعىدىق. 

قالاي بولسا دا، ناتيجە كوڭىلىمىزدەن شىعادى. ريشات اتالعان سپورت تۇرىنەن العاش رەت وليمپياداعا قاتىسىپ، ءوزىن جاقسى قىرىنان كورسەتتى. ول گەرمانيا، رەسەي، جۇڭگو، يتاليا، كانادا جانە جاپونيانىڭ مىقتى دەگەن اتلەتتەرىن ارتتا قالدىردى. مۇنداي جارىستاعى تاجىريبە ءومىر بويىنا قاجەت ەكەنى انىق. سپورتشى رەتىندە دە، باپكەر رەتىندە دە ولشەۋسىز تاجىريبە الدىق. 

سپورتشى رەتىندەگى ريشاتتىڭ ارتىقشىلىعى – جارىس الدىندا ءتاس-تۇيىن دايىن بولۋى جانە قاتەلىكسىز ونەر كورسەتۋى. ال كەمشىن تۇسى رەتىندە تاجىريبەنىڭ ازدىعى مەن حالىقارالىق جارىستارعا كوپ قاتىسپاعانىن ايتامىن. قارسىلاستارىنىڭ تاجىريبەسى ون جىلدان اسىپ كەتەدى، ال ريشات الەمدىك ارەنادا ەكى جىلدان بەرى كوزگە ءتۇسىپ ءجۇر»، - دەيدى حايبۋللين.