قازاقستان رەسپۋبليكاسى ءىىم ۇلتتىق ۇلانىنىڭ تاراز قالاسىندا ورنالاسقان «وڭتۇستىك» وڭىرلىك قولباسشىلىعىنا قاراستى 5513 اسكەري بولىمىندە ەرەكشە شارا ءوتتى.
پاريج وليمپياداسىنىڭ چەمپيونى، ەلىمىزدىڭ ماقتانىشى ەلدوس سمەتوۆ قۇقىقتىق ءتارتىپ اسكەرىنىڭ ساربازدارىمەن جۇزدەستى، دەپ حابارلايدى aqshamnews.kz.
بۇل كەزدەسۋگە ەلدوس سمەتوۆپەن بىرگە ونىڭ باپكەرى عالىمجان جىلگەلدييەۆ جانە جامبىل وبلىسى «دينامو» سپورت قوعامى قوعامدىق بىرلەستىگىنىڭ ورىنباسارى جومارت ىسقاق تا قاتىستى. ەركىن فورماتتاعى جيىندا داڭقتى دزيۋدوشىمىز ءوزىنىڭ سپورت سالاسىنداعى تاجىريبەسىمەن ءبولىستى. كەزدەسۋ اسەرلى ءارى تاربيەلىك ءمانى زور بولدى. ق ر ءىىم ۇلتتىق ۇلانىنىڭ سپورت كومانداسىن دايارلاۋ ورتالىعىنىڭ اسكەري قىزمەتشىسى ەلدوس سمەتوۆ ۇلاندىقتارعا ءوزىنىڭ سپورتتىق مانسابىنىڭ باستاۋىنان بۇگىنگى جەڭىستەرىنە دەيىنگى قىزىقتى جولىن بايانداپ بەردى. ول جەڭىسكە جەتۋدىڭ نەگىزگى قاعيداتتارى – ءتارتىپ، ەڭبەكقورلىق جانە تاباندىلىق ەكەنىن ەرەكشە اتاپ ءوتتى.
– الدارىڭىزعا قويعان ۇلكەن ماقساتتار بار، سول ماقساتتارعا قول جەتكىزۋ ءۇشىن ومىردەگى بارلىق قيىنشىلىق پەن اۋىرتپالىقتاردىڭ بارىنەن ءوتۋ كەرەك. جەتىستىككە كەز كەلگەن ادام وڭاي جولمەن جەتكەن ەمەس. ونى مەن ءوز تاجىريبەمنەن ايتىپ وتىرمىن. بارلىعى دا توككەن تەر مەن ەتكەن ەڭبەكتىن ناتيجەسى، – دەيدى ەلدوس سمەتوۆ.
شارا بارىسىندا وليمپيادا چەمپيونى دزيۋدو سپورتىنداعى ەرەكشە ادىس-تاسىلدەرىن كورسەتتى. جاس ۇلاندار چەمپيوننىڭ ءاربىر قيمىلىن مۇقيات باقىلاپ، سپورتقا دەگەن قىزىعۋشىلىقتارىن ودان ءارى ارتتىردى. سونىمەن قاتار ساربازدار چەمپيونعا وزدەرىن تولعاندىرعان سۇراقتارىن قويىپ، ونىڭ كەڭەستەرىن تىڭدادى. كەزدەسۋدە باپكەر عالىمجان جىلگەلدييەۆ تە ءسوز سويلەپ، ەلدوستىڭ جەڭىسكە جەتۋ جولىنداعى ەرەن ەڭبەگى مەن ىنتاسىن ەرەكشە اتاپ ءوتتى.
– ءبىزدىڭ قازاق جەرىمىزدە دزيۋدو كۇرەسىندە العاشقى وليمپيادانىڭ التىنى، ونىڭ ءوزىن جەرلەسىمىز جامبىل جەرىنىڭ سپورتشىسى الىپ كەلىپ وتىر. بۇل دەگەن ۇلكەن مارتەبە، ماقتانىش! جەڭىستىڭ جالاۋى تارازىمىزعا بەكەر كەلمەدى. سەبەبى كيەلى جەردەن كەزىندە جاقسىلىق ۇشكەمپىروۆ اعامىز دا وليمپيادا چەمپيونى اتانعان بولاتىن، – دەدى باپكەر.
ال جومارت ىسقاق سپورت پەن ءتارتىپتىڭ جاس ۇرپاق تاربيەسىندەگى ماڭىزى تۋرالى ايتىپ، جاس ۇلانداردى پاتريوتتىق رۋحتا تاربيەلەۋگە باعىتتالعان مۇنداي ءىس-شارالاردىڭ ءرولى زور ەكەنىن جەتكىزدى. كەزدەسۋ سوڭىندا قوناقتارعا ارنايى العىس حات تابىستالىپ، سىي قۇرمەت كورسەتىلدى. ساربازدار چەمپيونمەن ەستەلىك سۋرەتكە ءتۇسىپ، ونىڭ قولتاڭباسىن الدى. بۇل كەزدەسۋ ولاردىڭ جۇرەگىندە ۇزاق ۋاقىت ساقتالاتىنى ءسوزسىز. ەلدوس سمەتوۆتىڭ ءومىر جولى مەن جەتىستىكتەرى جاس ساربازدارعا ۇلكەن شابىت بەرىپ، ولاردى بولاشاقتا ەلىمىزدىڭ نامىسىن قورعاۋعا جاڭا سەرپىن سىيلاعانى انىق.