بيىلدان باستاپ ءار اتا-انا ۇيدەن شىقپاي-اق بالالارىن بالاباقشا كەزەگىنە قويا الادى.
ول ءۇشىن ءموبيلدى قوسىمشا ارقىلى وزىنە ۇناعان بوبەكجايدى تاڭداپ، كەزەك سانىن كورىپ، ءتىپتى بوس ورىننىڭ بار-جوعىن دا ءبىلىپ وتىرادى، دەپ حابارلايدى aqshamnews.kz.
بۇل ۆاۋچەرلىك قارجىلاندىرۋ جوباسى دەپ اتالادى. بىلتىر شىلدەدە پيلوتتىق نەگىزدە تارازدا توماعاسى سىپىرىلىپ، ارتىنشا شىمكەنت پەن تۇركىستاندا، جىل اياعىندا ورالدا جۇزەگە استى. ارتىقشىلىعى اتا-انا Indigo اقپاراتتىق جۇيەسى ارقىلى 4 بالاباقشانىڭ بىرەۋىن تاڭداپ، كەزەكتى كورەدى، بوس ورىندى بىلەدى.
سونداي-اق، اتا-انا مەملەكەتتەن بالالارى ءۇشىن بولىنەتىن قارجى كولەمىن دە قاراي الادى. ەلىمىزدە ءبىر بالا ءۇشىن جان باسىنا شاققانداعى قارجىلاندىرۋ كولەمى 58 مىڭ تەڭگە. بۇل تولەم بالاڭىز باراتىن بوبەكجاي شىعىنىنا جۇمسالادى. قاراجات اۋەلى ءار بالانىڭ اتىنا اشىلعان ەسەپ-شوتقا تۇسەدى. ءبۇلدىرشىننىڭ بالاباقشاعا بارعانى راستالعاننان كەيىن عانا مەكەمەگە اۋدارىلادى. دەمەك كەلمەگەن بالانى كەلدى دەپ جالعان ەسەپ جاساي المايدى.
جانار وسپانوۆا، №9 بوبەكجاي مەڭگەرۋشىسى:
ءبىر كۇن كەلمەي قالسا ءبىر كۇندىك قاراجاتىمىز الىنىپ كەتەدى. سەبەپسىز كەلمەي قالعان جاعدايدا. سوندىقتان ءار تاربيەشى سانالى تۇردە جۇمىس جاقسارتىپ جاتىر. سول بالا كۇندەلىكتى بالاباقشا كەلسىن دەگەن ماقساتتا.
ەلىمىزدە 1 ملن-نان استام بالا بالاباقشاعا بارادى. ال بىلتىردان باستاپ كەزەككە تۇرۋ كۇرت ازايعان. بۇل ساندىق جۇيەگە دايىندىق ناتيجەسى، دەيدى مينيسترلىك تاراپى.
مانارا اداموۆا، ق ر وقۋ-اعارتۋ مينيسترلىگىنىڭ مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى:
2016 جىلى 560 مىڭ بالا كەزەككە تۇرسا، كەزەكتەگى 2-6 جاستاعى بالا سانى 107 مىڭ بولدى. ال ءقازىر ۆاۋچەر جوباسىمەن قاتار ءجۇرىپ، ارى قاراي قارجىلاندىرىپ جاتقاننان كەيىن ءقازىر 2-6 جاستاعى كەزەكتە تۇرعان بالالاردىڭ سانى 84 مىڭ عانا قالدى.
ال جەڭىلدىكتەرى بار اتا-انالار قۇجاتىن تىركەۋ ارقىلى كەزەكتەن تىس ۆاۋچەر الا الادى.
ايتا كەتەيىك، بالاباقشالار ۆاۋچەرلىك مەحانيزمگە كوشكەننەن كەيىن ەشقانداي كونكۋرسقا قاتىسپايدى. قارجى اۋدارۋدى مينيسترلىكتىڭ ءبىرىڭعاي وپەراتورى عانا جۇزەگە اسىرادى.