مۇحتار اۋەزوۆ اتىنداعى قازاق ۇلتتىق دراما تەاترىنىڭ رەپەرتۋارى تاعى ءبىر جاڭا قويىلىممەن تولىقتى
امەريكانىڭ بەلگىلى دراماتۋرگى دونالد كوبۋرننىڭ ايگىلى جالعىز پەساسىن ەرمەك امانشايەۆ اۋدارعان. ال ونى ساحنالاعان رەجيسسەر - الما كاكىشيەۆا، دەپ حابارلايدى Almaty-akshamy.kz 24.kz-كە سىلتەمە جاساپ.
«ويىننان وت شىعار» تراگي-كومەديسىنىڭ وقيعاسى قارتتار ۇيىندە ءوربيدى. تاعدىر تالكەگىمەن وسىندا تۇرىپ جاتقان ۆەللەر مارتين مەن فونسيا ءدورسيدىڭ ءارقايسىسىندا ءبىر باسىنا جەتەرلىك قاسىرەتى بار. ال، ولاردىڭ قازىرگى ورتاق ەرمەگى كارتا ويناۋ. دجين ويىنىنان الدىنا جان سالماعان ۆەللەر فونسيادان بىرنەشە رەت وڭباي ۇتىلادى. بۇل ونىڭ اشۋىن تۋعىزىپ، تىنىشتىعىنان ايىرادى. دراما شيەلەنىسكەن سايىن، كەيىپكەرلەردىڭ جان جاراسى دا تەرەڭدەي تۇسەدى.
«ءارقايسىمىزدىڭ ءبىر ەگويزم ەگولارىمىز وزىمشىلدىگىمىز ءبىراق ءبىز ونى كورمەيمىز دە سودان وسىنداي ءبىر نەشەتۇرلى كاتاستروفالارعا ۇشىرايمىز. ىشكى پسيحولوگيچەسكيي. وسى جونىنەن كەلگەندە بۇل سپەكتاكل وزەكتى. وتە ومىرگە ءقازىر ءتىپتى قاجەت دەپ ويلايمىن. ويتەكەن سەبەبى، ادامدار ەندى ءوزى كىم ەكەنىنە بەت بۇرىپ قاراۋ كەرەك»، - دەيدى رەجيسسەر الما كاكىشيەۆا.
پەسا وسىدان 12 جىل بۇرىن «جىنويناق» دەگەن اتاۋمەن ساحنالانعان. ول كەزدە كەيىپكەرلەردى اعا بۋىن اكتەرلەر ويناعان ەدى. جاڭا نۇسقادا ۆەللەردىڭ ءرولىن اكتەر اسىلبەك بورانباي، فونسيانى جاس اكتريسا جانارگۇل جانامانوۆا سومدايدى. قويىلىمدا تەك ەكى كەيىپكەر بولسا دا ەش جالىقتىرمايدى. كورەرمەندى ءبىر كۇلدىرىپ، ءبىر مۇڭايتقان اكتەرلار ءسۇيسىندىردى، سەندىردى.
«ويىننان وت شىعار» تراگيكومەدياسىن اكتەرلار ەكى قۇرامدا وينايدى. ەكىنشى قۇرامدا ۆەللەردىڭ ءرولىن عاني قۇلجانوۆ، فونسيانى نۇرجان بەكسۇلتانوۆا سومدايدى.