«ويماشا» وقۋ-جاتتىعۋ پوليگونىندا جاۋىنگەرلىك اتىستار ءوتىپ جاتىر. ساباقتىڭ تاقىرىبى بولىمشەلەردىڭ كۇندىز دە، تۇندە دە نەگىزگى ۇرىس تۇرلەرىنەن وقۋ-جاۋىنگەرلىك مىندەتتەردى ورىنداۋىن كوزدەيدى، دەپ حابارلايدى almaty-akshamy.kz
اتالعان شاراعا مىڭنان استام اسكەري قىزمەتشى قاتىستى، 20-دان اسا اسكەري تەحنيكا، ونىڭ ىشىندە تانكتەر، بروندى ترانسپورتەرلەر مەن ارتيللەريالىق قارۋلار جۇمىلدىرىلدى.
پوليگوندا ناقتى ۇرىس كورىنىسىن جاساۋ ءۇشىن بروندى ماشينالاردى، اتىس نۇكتەلەرىن جانە قارسىلاستىڭ ءتىرى كۇشىن يميتاسيالايتىن نىساندار قولدانىلدى. شارتتى قارسىلاستىڭ نىساندارى مەن قارۋ-جاراقتارى ءتۇرلى وق-دارىلەرمەن جويىلدى. تەڭىز جاياۋ اسكەرلەرىنىڭ بولىمشەلەرى قارسىلاسپەن بەتپە-بەت كەلىپ، قورعانىستا، شابۋىلدا جانە كۇندىزگى-تۇنگى ۇرىس ءىس-قيمىلدارىن پىسىقتادى.
ارتيللەريالىق بولىمشەلەردىڭ ەكيپاجدارى مەن جاۋىنگەرلىك ەسەپتوپتارى اتىس پوزيسيالارىن ورىستەتۋ جانە ورنالاستىرۋ، ينجەنەرلىك جابدىقتار جانە ولاردى بۇركەمەلەۋ، نىسانالاردى بارلاۋ جانە وق اتۋدى باسقارۋ جونىندەگى نورماتيۆتەردى ورىنداۋ كىرەتىن جورىق ءىس-قيمىلدارىن پىسىقتادى.
پوليگوندا كومانديرلەردەن تاۋەلسىز شەشىمدەر قابىلداۋدى جانە سەنىپ تاپسىرىلعان بولىمشەلەرگە شەبەر باسشىلىق جاساۋدى تالاپ ەتەتىن جاعداي جاسالدى.
– ساباق بارىسىندا تەڭىز جاياۋ اسكەرلەرىنىڭ دالالىق ماشىعى مەن بولىمشەلەردىڭ ۇيلەسىمدىلىگى جەتىلدىرىلەدى. جاس كومانديرلەر ۇرىس بارىسىندا جەكە قۇرامدى باسقارۋ تاجىريبەسىن ۇيرەنەدى. اسكەري قىزمەتشىلەر ءىس جۇزىندە ۇرىسقا بارىنشا جاقىنداتىلعان جاعدايلاردا ارەكەت ەتە وتىرىپ، قويىلعان مىندەتتەردى ورىنداۋ ءتارتىبىن مەڭگەرەدى، – دەپ اتاپ ءوتتى 2 شابۋىلداۋ باتالونىنىڭ كومانديرى كاپيتان دامير ماقساتوۆ.
جاۋىنگەرلىك اتىس دەگەنىمىز - تاكتيكالىق دايىندىقتى وقىتۋدىڭ ەڭ جوعارى نىسانى، بولىمشەلەر مەن كىشى توپتاردىڭ جاۋىنگەرلىك ۇيلەسىمدىلىگى مەن اتىس جاتتىعۋلارىنىڭ قورىتىندى كەزەڭى.