استانادا سۋ تەحنولوگيالارى مەن رەسۋرستارى بويىنشا I حالىقارالىق «Global water» فورۋمى ءوتىپ جاتىر.
سۋ رەسۋرستارى جانە يرريگاسيا مينيسترلىگىنىڭ قولداۋىمەن ۇيىمداستىرىلعان ءىس-شاراعا ق ر پرەزيدەنتىنىڭ كەڭەسشىسى قانات بوزىمبايەۆ، Delivery Unit كەڭسەسىنىڭ سۋ رەسۋرستارى بلوگىنىڭ باسشىسى ارمان تۇرلىبەك، سونداي-اق بەيىندى مەملەكەتتىك ورگانداردىڭ، بيزنەستىڭ، عىلىمي جانە قوعامدىق ۇيىمداردىڭ وكىلدەرى، اۆستريا، يزرايل، فينليانديا، فرانسيا جانە باسقا مەملەكەتتەردىڭ سۋ سالاسىنىڭ جەتەكشى ساراپشىلارى قاتىستى، دەپ حابارلايدى Almaty-akshamy.kz Cۋ رەسۋرستارى جانە يرريگاسيا مينيسترلىگىنە سىلتەمە جاساپ.
قازاقستان مەن ورتالىق ازياداعى سۋ رەسۋرستارىن ءتيىمدى پايدالانۋ مەن قورعاۋ ماسەلەلەرى تالقىلانعان فورۋمدا سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ ەلىمىزدەگى سۋ سالاسىن ترانسفورماسيالاۋ باعىتتىندا جۇرگىزىلىپ جاتقان نەگىزگى جۇمىستار تۋرالى بايانداپ بەردى. ۆەدومستۆو باسشىسى ەلىمىزدەگى سۋ تاپشىلىعى پروبلەماسىن شەشۋ ءۇشىن ەكى نەگىزگى قۇجات - جاڭا سۋ كودەكسى جانە ۇكىمەت قابىلداعان سۋ رەسۋرستارىن باسقارۋ جۇيەسىن دامىتۋدىڭ 2030 جىلعا دەيىنگى تۇجىرىمداماسى ازىرلەنگەنىن اتاپ ءوتتى.
«جاڭا سۋ كودەكسىندە سۋ ۇنەمدەۋ ماسەلەسى ماڭىزدى ءرول اتقارادى. اتاپ ايتقاندا، سۋ رەسۋرستارىن ۇتىمدى پايدالانۋعا، سۋ ۇنەمدەۋ تەحنولوگيالارى مەن سۋدى قايتا پايدالانۋ جۇيەسىن قارقىندى ەنگىزۋگە، سونداي-اق جەراستى اۋىز سۋلارىن ماقساتسىز پايدالانۋعا جول بەرمەۋگە باسىمدىق بەرىلىپ وتىر. سۋ سالاسىنداعى بۇزۋشىلىق ءۇشىن جاۋاپكەرشىلىك زاڭ دەڭگەيىندە قاتاڭداتىلادى. سونداي-اق، كودەكسكە اۋىز سۋدىڭ ساپاسىن جاقسارتۋعا قويىلاتىن تالاپتار ەنگىزىلدى»،- دەدى نۇرجان نۇرجىگىتوۆ.
مينيستر اۋىل شارۋاشىلىعىندا سۋ ۇنەمدەۋ ماسەلەسىنە جەكە توقتالدى. ۆەدومستۆو شارۋالاردى سۋ ۇنەمدەۋ تەحنولوگيالارىن ورناتۋعا ىنتالاندىرۋ ءۇشىن اۋىل شارۋاشىلىعى مينيسترلىگىمەن بىرلەسىپ سۋ ۇنەمدەۋ جۇيەلەرىن ورناتۋ جانە ساتىپ الۋ شىعىندارىن سۋبسيديالاۋ ۇلەسىن 50%-دان 80%-عا دەيىن ۇلعايتۋ بويىنشا جۇمىس جۇرگىزىپ جاتىر.
«مەملەكەت باسشىسىنىڭ تاپسىرمالارىن ورىنداۋ ءۇشىن ۇكىمەت سۋ رەسۋرستارىن باسقارۋ جۇيەسىن دامىتۋدىڭ 2030 جىلعا دەيىنگى تۇجىرىمداماسىن بەكىتتى. ماڭىزدى قۇجات سۋ قورعاۋ قۇرىلىستارىن سالۋ جانە رەكونسترۋكسيالاۋ، گيدروتەحنيكالىق قۇرىلىستاردى، يرريگاسيالىق جۇيەلەردى رەكونسترۋكسيالاۋ، سۋ ۇنەمدەۋ تەحنولوگيالارىن سيفرلاندىرۋ جانە ەنگىزۋ جونىندەگى ءبىرقاتار شۇعىل شارالاردى ىسكە اسىرۋدى كوزدەيدى. مينيسترلىك كەشەندى جوسپاردىڭ ناتيجەسىندە ەل ەكونوميكاسىن كەپىلدى سۋمەن قامتاماسىز ەتۋگە، توتەنشە جاعدايلاردىڭ الدىن الۋعا جانە تاسىمالداۋ كەزىندە سۋدىڭ ءونىمسىز شىعىنىن 25%-عا دەيىن ازايتۋعا نيەتتى»،- دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
نۇرجان نۇرجىگىتوۆ «Global water» فورۋمى سۋ سالاسىنداعى ماسەلەلەر بويىنشا تاجىريبە، ءبىلىم جانە يدەيا الماسۋ، سونداي-اق ءتۇرلى مۇددەلى تاراپتار اراسىندا سەرىكتەستىك بايلانىستار مەن ىنتىماقتاستىق ورناتۋ ءۇشىن بىرەگەي الاڭعا اينالاتىنىنا سەنىم ءبىلدىردى. سونداي-اق، مينيسترلىك وكىلدەرى فورۋم اياسىندا ايتىلعان ۇسىنىستاردى نازارعا الىپ، جۇمىس بارىسىندا مىندەتتى تۇردە زەردەلەيتىنىن مالىمدەدى.