دانا دا، عالىم دا، قايراتكەر دە ءبارى-بارى ۇستازدان ءبىلىم العان. ۇستازسىز جەر بەتىندە جۇرگەن پەندە جوق شىعار... ۇستاز – ۇلى ماماندىق. سوندىقتان دا ۇستازعا قۇرمەت كورسەتىپ، ۇنەمى ماقتان تۇتاتىنىمىز!
وسىناۋ ۇستازدار كۇنى قارساڭىندا 157 جالپى ءبىلىم بەرەتىن مەكتەپتىڭ ۇستازى بايبوسىنوۆا نۋرزادا ايتبەكقىزىمەن اڭگىمەلەسكەن ەدىك.
ۇستاز دەگەن قىزىق ماماندىق قوي. ۇنەمى ىزدەنىپ جۇرەدى. ءار بالا كۇلىمدەپ، ءجۇزى جارقىن جۇرسە قۋاناتىن دا وسى ءمۇعالىم. ونىڭ ۇستىنە ۇستازداردىڭ ۋاقىتىنىڭ باسىم بولىگى شاكىرتتەرىمەن وتەدى. بولاشاق جارقىن بولۋى ءۇشىن ءبىز تالماي جۇمىس ىستەۋىمىز كەرەك. سوندا ەرتەڭگى كۇنى ەلىمىزدىڭ بولاشاعىنىڭ كەمەلدەنگەنىن كورەرىمىز انىق
جالپى مەن ماتەماتيكا پانىنەن ساباق بەرەمىن. بالالارعا ءبىلىم بەرۋ بارىسىندا ەكى نارسەگە ءمان بەرەمىن. ءبىرىنشى، بالالاردىڭ ويلاۋ قابىلەتىن ارتتىرۋ ءۇشىن ەسەپتەردى ويشا شىعارتۋعا تىرىسامىن. ەكىنشى، بالا تاقتادا ەسەپ شىعارىپ جاتقاندا داۋىستاپ ءتۇسىندىرىپ وتىرادى. بۇل بالانىڭ جاتىق سويلەۋىنە اسەر ەتەدى. گادجەتتەر مەن تەلەفونعا ۇڭىلگەن ۋاقىتتا بالالاردىڭ كوبى ويىن جەتكىزە الماي جاتادى. ال مەن قولدانعان ءادىس ارقىلى بالا ويلانىپ، ويىن جەتكىزۋدە مۇدىرمەيتىن بولادى.
وتكەن جىلى بالالاردىڭ اراسىندا «مەنىڭ مەكتەبىم» اتتى ەسسە جازعىزدىم. ءسويتىپ بالالاردىڭ جازعانىن جيناپ، جۋرنال قىلىپ شىعاردىم. بۇل بالالاردى ىنتالاندىرا تۇسكەنى انىق. ماقساتى ايقىن بالا ءتۇپتىڭ تۇبىندە ءوز بيىگىن باعىندىراتىنى انىق. ماسەلەن، وقىتىپ جۇرگەن شاكىرتتەرىمنىڭ ءبىر پاراسى نازاربايەۆ زياتكەرلىك مەكتەبىنە، و.جاۋتىكوۆ اتىنداعى فيزيكا-ماتەماتيكا ورتا مەكتەپ-ينتەرناتىنا ءتۇسىپ جاتىر. ارينە، قۋاناسىڭ! ويتكەنى، بۇل ءبىلىم جولىنداعى ەڭبەگىڭنىڭ وتەۋى ىسپەتتى.
ءبىر كەزدەرى قالقامان شاعىن اۋدانىندا مەكتەپ سانى از بولعاندىقتان «يۋ» سىنىبى بولعان ەدى. مەملەكەت باسشىسىنىڭ تاپسىرماسىنا سايكەس شاعىن اۋداندا بىرنەشە مەكتەپ سالىندى. ناتيجەسىندە، سىنىپ سانى قىسقاردى. جالپى، وقۋ-اعارتۋ مينيسترلىگىنىڭ كەلەلى ىستەرىنىڭ ارقاسىندا ءمۇعالىم مارتەبەسى كوتەرىلىپ، ۇستازعا دەگەن ۇستانىم دا جاقساردى. ەندى بىزگە تالماي ەڭبەكتەنىپ، بالالاردىڭ ءبىلىمدى بولۋىنا ىقپال ەتۋ عانا قالدى.
تاۋەلسىزدىكتىڭ 30 جىلدىعىندا ۇيىمداستىرىلعان "ەلىمىزدىڭ ەركىندىگى - تاۋەلسىزدىك" كونكۋرسىنا قاتىستىق. ناتيجەسىندە ەكىنشى ورىن الدىم. ارينە، قانشاما تالانتتى ۇستازداردىڭ اراسىنان ەكىنشى ورىندى الۋدىڭ ءوزى زور مارتەبە، -دەيدى ۇلاعاتتى ۇستاز
ايتا كەتۋ كەرەك، نۇرزادا ايتبەك قىزى ماسكەۋ ينستيتۋتىنىڭ تانىمال پەتەرسون وقۋلىعىن رەسمي تۇردە كەلىسىمشارت بويىنشا قازاقستاندا ءبىرىنشى بولىپ قازاق تىلىنە اۋدارعان بولاتىن.