قاراشا ايىندا «الماتى» تەلەارناسىنان «اكادەميا» كينوسىنىڭ پرەمەراسى كورسەتىلەدى
قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا اكادەمياسى باستىعىنىڭ ورىنباسارى – تاربيەلىك، الەۋمەتتىك-قۇقىقتىق جانە يدەولوگيالىق جۇمىستار باسقارماسىنىڭ باستىعى پولكوۆنيك ايدوس الييەۆ كۋرسانتتار تۋرالى سەريالدىڭ ءتۇسىرىلىم بارىسىمەن تانىستى، دەپ حابارلايدى Almaty-akshamy.kz.
شەكارا اكادەمياسىنىڭ اۋماعىنداعى ساياباقتا باس تاربيەشى ءتۇسىرىلىم توبىنىڭ شىعارماشىلىق ۇجىمىمەن كەزدەستى. ءبىر اپتا بۇرىن باستالعان ءتۇسىرىلىم ءبىر ايعا سوزىلادى. تەلەحيكايانى ءتۇسىرۋ جۇمىستارى 20 كۇنگە جوسپارلانعان. فيلم 25 مينۋتتىق، 10 سەريالدان تۇرادى. تەلەحيكايانىڭ پرەمەراسى 2023 جىلدىڭ قاراشا ايىندا الماتى تەلەارناسىندا كورسەتىلەدى. سەريال قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ قولداۋىمەن ءتۇسىرىلىپ جاتىر. كينوكارتيناداعى قيمىلدار شەكارا اكادەمياسىنىڭ قابىرعاسىندا وتەدى. سيۋجەتتە كوبىنەسە وفيسەر بولۋدى ارماندايتىن كۋرسانتتاردى كورەمىز. اسكەري ادامداردىڭ ومىرىنە ارنالعان كوپتەگەن فيلمدەر سياقتى مۇندا دا وتان، ابىروي، پارىز، جاۋاپكەرشىلىك پەن پاتريوتتىق سەزىمى جانە وتانعا دەگەن سۇيىسپەنشىلىك سياقتى ماڭىزدى تاقىرىپتار قوزعالادى. ارينە، ماحاببات حيكايالارىن دا اينالىپ وتپەيدى.
بۇل قازاقستان رەسپۋبليكاسى ۇلتتىق قاۋىپسىزدىك كوميتەتى ءۇشىن وفيسەر كادرلارىن دايارلايتىن اسكەري وقۋ ورنىنىڭ كۋرسانتتارى تۋرالى ەلىمىزدەگى العاشقى سەريال بولماق. شىعارماشىلىق توپتى قۇتتىقتاعان ايدوس ابديۆاحابوۆيچ فيلمدە كۋرسانتتاردىڭ قاربالاسقا تولى كۇندەرى تۋرالى قىزىقتى وقيعالار كورسەتىلەتىنىنە جانە جاستاردىڭ اسكەري ومىرگە دەگەن قىزىعۋشىلىعىن تۋدىرتاتىنىنا سەنىم ءبىلدىردى. ءداستۇر بويىنشا ءتۇسىرىلىم توبىمەن بىرگە تاباقشا سىندىرعان تاربيەشى وفيسەر: «بۇل سەريال قوعامدا، ونىڭ ىشىندە ەر ادامدار اراسىندا سىلكىنىس تۋدىرادى دەپ ويلايمىن»، - دەدى.
ايتا كەتۋ كەرەك، ق ر ۇقك شەكارا اكادەمياسىنىڭ عاسىرعا جۋىق تاريحى بار. اسكەري اكادەميا وسى جىلدار ىشىندە مىڭداعان وفيسەر كادرلاردى دايىنداپ شىعاردى. ونىڭ العاشقى تۇلەكتەرىنىڭ قاتارىندا گەنەرال-مايور ە.الداجۋمانوۆ بار.
«وسى سەريال ارقىلى قالىڭ جۇرتشىلىق شەكاراشىلاردىڭ ومىرىمەن جاقىنىراق تانىسىپ، كۋرسانتتاردىڭ بولاشاق مۇمكىندىكتەرىنە نازار اۋدارعانىن قالايمىن. بارلىق جوعارى سىنىپ وقۋشىلارىن سەريالدى كورۋگە شاقىرامىن. بالكىم، وسى سەريالدى كورگەن سوڭ كەلەشەكتە ولاردىڭ اراسىنان ءوز ءومىرىن شەكارا قىزمەتىمەن بايلانىستىرعان ناعىز كاسىبي اسكەري، ەل قورعاۋشىسى شىعاتىن بولار»، - دەدى بىزگە بەرگەن سۇقباتىندا ا.الييەۆ.
