الماتىدا جىل باسىنان بەرى 800-دەن استام كاسىپكەر 100 ملرد تەڭگە كولەمىندە مەملەكەتتىك قولداۋعا يە بولدى.
بۇل تۋرالى «Damu» قورىنىڭ وكىلدەرى مالىمدەدى، دەپ حابارلايدى Almaty-akshamy.kz.
جالپى ەلىمىزدەگى شاعىن، ورتا جانە ءىرى كاسىپكەرلەر وسى ينستيتۋت ارقىلى ءتورت باعىت بويىنشا مەملەكەتتىك سۋبسيديا الىپ وتىر. ەلىمىزدە باسىم ەكونوميكالىق باعىت بويىنشا جۇمىس ىستەيتىن كاسىپكەرلەرگە كومەك ارتىپ كەلەدى. ناقتىراق ايتساق، اۋىلشارۋاشىلىق سەكتورى، ءوندىرىس، تۋريزم، دەنساۋلىق ساقتاۋ، ءبىلىم بەرۋ جانە قىزمەت كورسەتۋ سالاسىنداعى كاسىپەرلەرگە 3 ملرد تەڭگەگە دەيىن سۋبسيديا بەرىلەدى. مىسالى، الماتى ماڭىنداعى مىنا جىلىجاي قىزانىق، قيار، بايالدى وسىرۋمەن اينالىسادى. جۋىردا 2 ملرد تەڭگە جەڭىلدەتىلگەن نەسيە الىپتى. ول اقشاعا ءوندىرىستى كەڭەيتىپ، ليمون ءوسىرۋدى جوسپارلاپ وتىر. ال ءقازىر ءوسىرىلىپ وتىرعان كوكونىستىڭ دەنى ىشكى نارىقتا ساتىلادى.
مەملەكەتتىك قولداۋدىڭ تاعى ءبىر جولى-كەپىلدىك بەرۋ. ياعني كاسىپكەرلەر نەسيە العان كەزدە كەپىلگە قويىلاتىن مۇلىك قۇنى جەتپەگەن جاعدايدا، قور قوسىمشا كومەك بەرەدى. كەپىلدەندىرۋ بويىنشا 500-گە تارتا كاسىپكەر 20 ملرد تەڭگەگە جۋىق قولداۋ تاپقان.
ال شاعىن وندىرىسپەن اينالىساتىن ازاماتتارعا 20 ملن تەڭگەگە دەيىن جەڭىلدەتىلگەن نەسيە قاراستىرىلعان. ەكونوميكالىق باسىم باعىتتار تالابىنا كىرمەيتىن كاسىپورىندارعا دا ارنالعان باعدارلاما بار. الماتىدا تىركەلگەن جانە باعدارلاماعا ساي ەمەس كاسىپكەرلەر دە 6 پايىزبەن 100 ملن تەڭگەگە دەيىن نەسيە الۋعا بولادى.
جاندوس نۇرعازينوۆ، Damu قورىنىڭ فيليال باسشىسى:
- مەملەكەتتىڭ باستى ماقساتى – مىناۋ كاسىپكەردىڭ نەسيەلىك جۇگىن ازايتۋ. قازىرگى ۋاقىتتا 21،5 پايىزبەن نەسيە الادى. سونىڭ 8 پايىزىن كاسىپكەر ءوزى تولەيدى. قالعان 13،5 پايىزىن مەملەكەت سۋبسيديالاۋ ارقىلى تولەپ بەرەدى بەس جىلدىڭ ىشىندە.
جالپى، الماتى قالاسىندا 2010 جىلدان بەرى 15 مىڭنان استام كاسىپكەر مەملەكەتتىك قولداۋ العان. بۇل قاراجاتتىڭ ماقساتتى پايدالانۋىن قور وكىلدەرى باقىلاپ وتىرادى. وسىلايشا جۇمىستارىن جولعا قويعان كاسىپورىندار سالىق تولەپ، ەل ەكونوميكاسىنىڭ دامۋىنا ءوز ۇلەستەرىن قوسىپ وتىر.