مەملەكەت باسشىسىندا ءوڭىر باسشىلارىن ماسليحاتپەن كەڭەسپەي جۇمىستان بوساتۋ قۇقىعى ساقتالادى.
وبلىس اكىمدەرى جاناما سايلاۋ ارقىلى تاعايىندالادى. بۇل تۋرالى ق ر پرەزيدەنتى قاسىم-جومارت توقايەۆ قازاقستان حالقىنا جولداۋىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سونداي-اق ءماسليحاتتاردىڭ ىقپالىن بارىنشا كۇشەيتۋ ءۇشىن وبلىس اكىمدەرىن تاعايىنداۋ ءتارتىبىن وزگەرتۋ قاجەت دەپ سانايمىن. ءقازىر ءماسليحات دەپۋتاتتارى مەملەكەت باسشىسى ۇسىناتىن ءبىر عانا كانديداتۋراعا كەلىسىم بەرەدى نەمەسە كەلىسىم بەرمەيدى»، - دەدى مەملەكەت باسشىسى.
وسىعان وراي قاسىم-جومارت توقايەۆ پرەزيدەنتكە وبلىستاردىڭ، رەسپۋبليكالىق ماڭىزى بار قالالاردىڭ اكىمى لاۋازىمىنا بالاما نەگىزدە كەمىندە ەكى كانديدات ۇسىنۋ قۇقىعىن رەگلامەنتتەيتىن زاڭناماعا وزگەرتۋلەر ەنگىزۋ قاجەتتىگىن ايتتى.
«وسىلايشا، پرەزيدەنت ءماسليحاتتاردىڭ قاراۋ ناتيجەسىن ەسكەرە وتىرىپ، وبلىستاردىڭ جانە رەسپۋبليكالىق ماڭىزى بار قالالاردىڭ اكىمدەرىن تاعايىندايتىن بولادى. تۇپتەپ كەلگەندە، وڭىرلەردىڭ باسشىلارىن جاناما سايلاۋ تۋرالى ءسوز بولىپ وتىر. سونىمەن قاتار مەملەكەت باسشىسىندا ءوڭىر باسشىلارىن ماسليحاتپەن كەڭەسپەي جۇمىستان بوساتۋ قۇقىعى ساقتالادى»، - دەدى قاسىم-جومارت توقايەۆ.