نىسانا كوزدەۋدەن الەم كۋبوگىندا قازاقستان ەكى جۇلدە الدى

دجاكارتاداعى باسەكەگە بارلىعى 15 قازاقستاندىق سپورتشى اتتاندى

يندونەزيا استاناسى دجاكارتادا ۆينتوۆكا جانە تاپانشامەن نىسانا كوزدەۋدەن الەم كۋبوگى ءوتىپ جاتىر، دەپ حابارلادى Almaty-akshamy.kz.

بۇگىن قازاقستان قۇراماسىنىڭ قورجىنىنا ەكىنشى جۇلدە ءتۇستى.

قازاقستاندىق ۆالەريي راحىمجان مەن يرينا يۋنۋسمەتوۆا پنيەۆماتيكالىق تاپانشامەن 10 مەتردەن نىسانا كوزدەۋدە قولا مەدال جەڭىپ الدى. قازاقستان قۇراماسى ارالاس جۇپتار اراسىنداعى جۇلدەگە تالاستا وڭتۇستىك كورەيا سپورتشىلارىن 16-10 ەسەبىمەن جەڭدى. ەكىنشى قولا اۋستريا مەرگەندەرىنە بۇيىردى.

ايتا كەتەيىك، كەشە ۆالەريي راحىمجان پنيەۆماتيكالىق تاپانشامەن 10 مەتردەن نىسانا كوزدەۋدەن جەكەلەي سىندا 4-ورىن العان. دجاكارتاداعى باسەكەگە بارلىعى 15 قازاقستاندىق سپورتشى اتتاندى. ولاردىڭ ءبارى الەم كۋبوگى قارساڭىندا 10-26 قاڭتار ارالىعىندا كۋۆەيتتە وتكەن وقۋ-جاتتىعۋ جيىنىنا قاتىسقان.

ءقازىر قازاقستان جانە پولشا قۇراماسى جالپى ەسەپتە 2 مەدالمەن (1 كۇمىس، 1 قولا) 7-ورىندا تۇر.

يندونەزياداعى سايىستا (31 ەلدەن 300-گە جۋىق سپورتشى كەلگەن) رەيتينگ ۇپايلارى ساراپقا سالىنىپ جاتىر. ال بۇل ۇپايلار كەيىن پاريج وليمپياداسىنا قاتىسۋعا مۇمكىندىك بەرەدى. الەم كۋبوگى 7 اقپاندا مارەسىنە جەتەدى.