ق ر پارلامەنتى سەناتىنىڭ دەپۋتاتى نۇرتورە ءجۇسىپ ەلدەگى قازىرگى جاعدايعا قاتىستى پىكىر ءبىلدىردى، دەپ حابارلايدى almaty-akshamy.kz قازاقپارات تىلشىسىنە سىلتەمە جاساپ.
«ەلدەگى جاعدايدى مەملەكەت باسشىسى تولىق باقىلاۋىنا الدى. وسى ورايدا اقوردادا شۇعىل جيىن ءوتىپ، پرەزيدەنت ۇكىمەتتىڭ وتستاۆكاسىن قابىل الدى. جاڭا ۇكىمەت قۇرامى جاساقتالعانشا پرەمەر-مينيستر مىندەتىن اتقارۋ ۋاقىتشا ءاليحان سمايلوۆقا جۇكتەلدى. سونداي-اق، ەلىمىزدىڭ 2 وڭىرىندە الماتى قالاسى جانە ماڭعىستاۋ وبلىسىندا ۋاقىتشا توتەنشە جاعداي ەنگىزىلدى. ءقازىر ەلدەگى جاعدايدى قازاقستاننىڭ ءار ازاماتى ءۇشىن سىن ساعاتى دەپ ايتۋعا بولادى. ويتكەنى، تاۋەلسىزدىك پەن حالىقتىڭ تاعدىرى تارازى باسىندا تۇر. ەلدىڭ سىنالار شاعى، سوندىقتان ەل باسىنا كۇن تۋعان ساتتە اقىل مەن پاراساتتىلىققا جۇگىنگەن ءجون. حالىق تالاپ ەتتى، بيلىك ونىڭ ءۇنىن ەستىپ، 2 وڭىردە گازدىڭ باعاسىن 50 تەڭگەگە دەيىن ارزانداتۋ تۋرالى شەشىم قابىلداندى»، - دەدى نۇرتورە ءجۇسىپ.
حالىق قالاۋلىسىنىڭ مالىمدەۋىنشە، تالاپ پەن ۇسىنىسىنىڭ شەشىمى سىندارلى ديالوگ ارقىلى تابۋى ءتيىس.
«ەل سابىرعا بوي الدىرىپ، ماسەلەنىڭ زاڭ اياسىندا شەشىلگەنى ابزال. حالىقتىڭ تولقۋى ينفلياسيانىڭ ورشۋىمەن بايلانىستى. جانە بۇعان ۇكىمەتتىڭ كىناسى بار ەكەندىگىن پرەزيدەنت اشىپ ايتتى. وعان ەلدەگى باعا تۇراقسىزدىعىن قوسىڭىز. حالىق تاراپىنان الەۋمەتتىك-ەكونوميكالىق تالاپتاردىڭ قويىلۋى ماسەلەنىڭ شيەلەنىسىپ كەتكەندىگىن كورسەتەدى. سوندىقتان ەندى جاساقتالاتىن ۇكىمەتتىڭ الدىندا ەلدىڭ الەۋمەتتىك جاعدايىن رەتتەۋ مىندەتى تۇر. ودان بولەك، گاز، بەنزين، ديزەل باعاسىنىڭ قىمباتتاۋى بولدى. وسى ورايدا ەلىمىزدىڭ مۇناي-گاز ساياساتىن قايتا قاراپ، شۇعىل رەتتەۋ كەرەك دەپ ويلايمىن»، - دەيدى ول.
سونداي-اق، سەنات دەپۋتاتى حالىقتى سابىرلى بولۋعا شاقىردى.
«حالىق زاڭعا سايكەس بەيبىت شەرۋ وتكىزۋدىڭ ەرەجەسىن ساقتاسا. سوسىن جاستارىمىزدى قىزۋقاندىلىققا بوي الدىرماۋعا شاقىرامىن. سەبەبى، ارانداتۋشىلىق پەن توبەلەس ماسەلەنى شەشپەيدى، كەرىسىنشە تىعىرىققا تىرەيدى. سوندىقتان ارتىق ەموسيادان اباي بولعان ءجون. باستىسى تاۋەلسىزدىكتىڭ تۇتاستىعى مەن حالىقتىڭ اماندىعى»، - دەدى ن. ءجۇسىپ.