ق ر سەنات ءتوراعاسى ماۋلەن اشىمبايەۆ جەلىدەگى پاراقشاسىندا مەملەكەت باسشىسى قاسىم-جومارت توقايەۆتىڭ ەلىمىزدەگى الەۋمەتتىك-ەكونوميكالىق جاعدايعا قاتىستى كەڭەستە بەرگەن تاپسىرمالارى تۋرالى ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«مەملەكەت باسشىسى قاسىم-جومارت كەمەل ۇلى توقايەۆ ەلىمىزدەگى الەۋمەتتىك-ەكونوميكالىق جاعدايعا قاتىستى كەڭەس وتكىزدى. كەڭەس بارىسىندا قازىرگى احۋالدى تۇراقتاندىرۋ ءۇشىن مۇناي ونىمدەرىنىڭ باعاسىنا 180 كۇنگە مەملەكەتتىك رەتتەۋدى ەنگىزۋ جونىندە ناقتى تاپسىرما بەردى. سونداي-اق الەۋمەتتىك ماڭىزى بار ازىق-تۇلىك تاۋارلارىنىڭ باعاسى بويىنشا مەملەكەتتىك رەتتەۋدى ەنگىزۋ، كوممۋنالدىق تاريفتەردى كوتەرۋگە 180 كۇنگە موراتوريي ەنگىزۋ قاجەتتىگىن قاراستىرۋ، حالىقتىڭ الەۋمەتتىك جاعدايى ناشار توپتارى ءۇشىن نارىقتاعى باسپانانى جالعا الۋ قۇنىن سۋبسيديالاۋ ماسەلەسىن قاراستىرۋ، دەنساۋلىق ساقتاۋ جانە بالالار ماسەلەلەرىن شەشۋ ءۇشىن «قازاقستان حالقىنا» دەپ اتالاتىن قوعامدىق قور قۇرۋ، ونى مەملەكەتتىك جانە جەكە كوزدەر ارقىلى قارجىلاندىرۋ جونىندە قوسىمشا تاپسىرمالار بەردى. پرەزيدەنتىمىز «جەكە تۇلعالاردىڭ بانكروتتىعى تۋرالى» زاڭ ازىرلەۋدى جانە باس پروكۋراتۋراعا باسەكەلەستىكتى قورعاۋ اگەنتتىگىمەن بىرلەسىپ، باعالىق ءسوز بايلاسۋ مەن باسەكەلەستىككە قارسى باسقا دا ىس-ارەكەتتەرگە قاتىستى تەرگەۋ جۇرگىزۋدى دە تاپسىردى»،- دەپ جازدى م.اشىمبايەۆ جەلىدەگى پاراقشاسىندا.
سونىمەن قاتار ول مەملەكەت باسشىسى بۇگىن تۇندە قازاقستان حالقىنا بەينەۇندەۋ جاريالاپ، ەلدى ىشتەن جانە سىرتتان بولعان سان ءتۇرلى جالعان اقپاراتتارعا سەنىپ، ەرەۋىلگە سالىنعان توپتىڭ قيتۇرقى ارەكەتتەرى مەن تارتىپسىزدىككە ەرمەي، پاراساتپەن جانە اقىلمەن عانا شەشىم قابىلداۋعا شاقىرعانىن جانە پرەزيدەنتىمىز ايتقانداي، ءدال ءقازىر بىزگە ءوزارا سەنىم مەن ديالوگ كەرەك ەكەنىن جەتكىزدى.
«ازاماتتاردىڭ قاۋىپسىزدىگىن جانە قوعامدىق قاۋىپسىزدىكتى قامتاماسىز ەتۋ ءۇشىن مەملەكەت باسشىسىنىڭ جارلىعىمەن الماتى قالاسى مەن ماڭعىستاۋ جانە الماتى وبلىستارىندا توتەنشە جاعداي ەنگىزىلگەنى بەلگىلى. پرەزيدەنتىمىز قابىلداعان بۇل شۇعىل شارالار ەلىمىزدىڭ تۇراقتىلىعىن نىعايتۋدى كوزدەيدى. سوندىقتان ءدال ءقازىر بىزدەر ءۇشىن مەملەكەت باسشىسىنىڭ شەشىمدەرىنە قولداۋ ءبىلدىرىپ، ەلدىڭ بەرەكە-بىرلىگىن بەكەمدەي ءتۇسۋ اسا ماڭىزدى»، - دەپ تولىقتىردىردى ول.