جۋرناليست اتىنداعى شاكىرتاقىعا لايىقتىلاردى ىرىكتەۋ ءۇشىن بايقاۋ ەكى اي جۇرگىزىلگەن
«قازاقستان» تەلەراديوكورپوراسياسى جۋرناليست، تەلەجۇرگىزۋشى نۇرتىلەۋ يمانعالي ۇلى اتىنداعى ستيپەنديا يەگەرلەرىن ماراپاتتادى، دەپ حابارلايدى Almaty-akshamy.kz
بايقاۋ جوو جۋرناليستيكا فاكۋلتەتىنىڭ ستۋدەنتتەرى اراسىندا ەكى اي كولەمىندە جۇرگىزىلگەن. كورپوراسيانىڭ وقۋ گرانتى ن.يمانعالي ۇلىنىڭ تەليەۆيزياداعى تۇلعاسى جايلى ۇزدىك بەينەماتەريال ۇسىنعان ءۇش ستۋدەنتكە تابىستالدى.
باسقارما ءتورايىمى ءلاززات تانىسباي بايقاۋدىڭ ماقساتى قازاق تەليەۆيزياسى قالىپتاسا باستاعان ۋاقىتتان تەلەەفيردەگى بەينەسىمەن تۇتاس بۋىنعا ۇلگى بولعان نۇرتىلەۋ يمانعالي ۇلىنىڭ ەسىمى مەن شىعارماشىلىعىن ناسيحاتتاۋ، ءىزباسارلارىنا قولداۋ كورسەتۋ ەكەنىن اتاپ ءوتتى.
«وقۋ گرانتى باستاپقىدا ەكى ستۋدەنتكە بەلگىلەنگەن. كەلىپ تۇسكەن جۇمىستار اراسىندا نۇرتىلەۋ يمانعالي ۇلىنىڭ شىعارماشىلىعىن، تەلەجۇرگىزۋشى، تۇلعا رەتىندەگى ەرەكشەلىكتەرىن وزگەشە قىرىنان اشىپ كورسەتكەن ستۋدەنتتەر بولدى. بەينەماتەريالداردى قاراستىرا وتىرىپ، تاعى ءبىر ۇمىتكەردىڭ جۇمىسىن ۇزدىك دەپ تانىپ، قوسىمشا گرانت بەرۋ تۋرالى شەشىم قابىلدادىق»، - دەدى ل.تانىسباي.
تەلەراديوكورپوراسيا قىزمەتكەرلەرىنەن قۇرىلعان ارنايى كوميسسيانىڭ شەشىمىمەن الماتى قالاسىنداعى حالىقارالىق اقپاراتتىق تەحنولوگيالار ۋنيۆەرسيتەتىنىڭ 3 كۋرس ستۋدەنتى اڭساعان عالالادين، م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ 2 كۋرس ستۋدەنتى قانات جولداسبەكوۆ، س.امانجولوۆ اتىنداعى شىعىس قازاقستان ۋنيۆەرسيتەتىنىڭ 4 كۋرس ستۋدەنتى كۇمىسجان يسان نۇرتىلەۋ يمانعالي ۇلى اتىنداعى وقۋ گرانتىنىڭ يەگەرى اتاندى.
«50 مىڭ تەڭگە كولەمىندەگى اي سايىنعى ستيپەنديا ستۋدەنتتەرگە ءبىر وقۋ جىلىنا تولەنەدى»، - دەپ حابارلادى ارنا سايتى.