ەلىمىزدە سپورتتىڭ ءار سالاسى قارقىندى دامىپ كەلەدى. سونىڭ ىشىندە دجيۋ-دجيتسۋ كۇرەسى ەرەكشە قارقىن الىپ، جاستار اراسىندا تانىمال سپورت تۇرىنە اينالدى. الماتى قالاسىندا جانە الماتى مەن جەتىسۋ وبلىستارىندا ارنايى سپورت زالدارىن اشىپ، دجيۋ-دجيتسۋدىڭ دامۋىنا ەلەۋلى ۇلەس قوسىپ جۇرگەن، گرەپپلينگتەن ازيا چەمپيونى، دجيۋ-دجيتسۋدان قارا بەلبەۋ يەگەرى نۇرسۇلتان ورىنباساروۆتىڭ ەڭبەگى بۇل باعىتتا ەرەكشە.
سپورت – ءپاتريوتيزمنىڭ مەكتەبى
نۇرسۇلتان ورىنباساروۆ نەگىزىن قالاعان «Sagadat batyr-QTT» سپورت كلۋبى ەلىمىزدە عانا ەمەس، كورشىلەس قىرعىزستان مەن رەسەيدە وتكەن حالىقارالىق تۋرنيرلەردە دە ۇزدىك ناتيجەلەر كورسەتىپ كەلەدى. سپورت كلۋبىنا ساعادات نۇرماعامبەتوۆتىڭ ەسىمىن بەرۋ ارقىلى ول جاستاردى اسكەري-پاتريوتتىق رۋحتا تاربيەلەۋگە دەن قويدى.
«باسەكەگە قابىلەتتى مەملەكەت بولۋ ءۇشىن رۋحى بيىك، دەنى ساۋ ۇرپاق تاربيەلەۋ قاجەت. چەمپيون بولماسا دا، وتانعا ادال قىزمەت ەتەتىن ازاماتتاردى تاربيەلەۋدى ماقسات ەتەمىز»، – دەيدى سپورتشى.
سپورتقا جول ەرتە باستالادى
نۇرسۇلتان ورىنباساروۆتىڭ ايتۋىنشا، دجيۋ-دجيتسۋعا 4 جاستان باستاپ بەرگەن دۇرىس. الايدا جاس شەكتەۋى جوق، بۇل سپورت تۇرىمەن ءتىپتى 40 جاستان اسقان ازاماتتار دا اينالىسا الادى. دەگەنمەن، بالاعا سپورتقا قىزىعۋشىلىقتى وياتۋ جانە ونىڭ دەنساۋلىعىنا زيان كەلتىرمەۋ ءۇشىن باپكەردىڭ تاجىريبەسى ماڭىزدى ءرول اتقارادى.
«جاقسى باپكەر بالانىڭ جەڭىسكە جەتۋىنە عانا ەمەس، ونىڭ سپورتقا دەگەن سۇيىسپەنشىلىگىن ارتتىرۋعا دا ۇلەس قوسادى»، – دەيدى ول.
چەمپيون بولۋ – تاباندىلىقتىڭ جەمىسى
چەمپيون اتانۋ ءۇشىن تەك دەنە كۇشى جەتكىلىكسىز، اقىل-وي مەن مىنەزدىڭ ۇيلەسىمى قاجەت. نۇرسۇلتان سپورتتى ۇلكەن عىلىم دەپ ەسەپتەيدى.
«سپورتتا تەحنيكالىق، تاكتيكالىق جانە پسيحولوگيالىق دايىندىق قاجەت. شەت ەلدە دجيۋ-دجيتسۋدى "تاتاميدەگى شاحمات" دەپ اتايدى. بۇل شىندىققا جاقىن. ءار ءادىستى ويلانىپ، كۇرەستىڭ تاكتيكاسىن باعامداپ ارەكەت ەتكەن سپورتشى عانا جەڭىسكە جەتەدى»، – دەيدى ول.
دجيۋ-دجيتسۋ: سپورت ارقىلى تاربيە
نۇرسۇلتان تەك سپورتتى ۇيرەتۋمەن شەكتەلمەيدى. ول بالالاردى ادامگەرشىلىككە، تاباندىلىق پەن ءوزارا قۇرمەتكە تاربيەلەۋگە ەرەكشە نازار اۋدارادى.
«سپورت – تاربيە مەن تاباندىلىقتىڭ مەكتەبى. ءبىز سپورت ارقىلى بالالاردى شىنشىل، باتىل ءارى مەيىرىمدى ازامات ەتىپ تاربيەلەۋگە تىرىسامىز»، – دەيدى چەمپيون.
دجيۋ-دجيتسۋ تەك سپورت ەمەس، ادامدى جان-جاقتى دامىتاتىن ءومىر مەكتەبى. نۇرسۇلتان ورىنباساروۆ سياقتى جانداردىڭ ەڭبەگىمەن بۇل سپورت ءتۇرى ەلىمىزدە كەڭ قانات جايىپ كەلەدى. بالالار ءۇشىن جاڭا مۇمكىندىكتەر اشىلىپ، سپورت ارقىلى ۇلتتىق رۋحتى نىعايتۋ جولى جالعاسۋدا.