الماتىدا قۇقىق قورعاۋ ورگاندارى اكىمشىلىك اۋماقتاردا قىلمىستىڭ الدىن الۋ شارالارىن كۇشەيتتى.
قالادا «ۋچاسكە» رەسپۋبليكالىق جەدەل-پروفيلاكتيكالىق ءىس-شاراسى وتكىزىلۋدە، وعان جەرگىلىكتى پوليسيا قىزمەتكەرلەرى، كوشى-قون قىزمەتى، ەكسترەميزمگە قارسى كۇرەس بولىمشەلەرىنىڭ وكىلدەرى جۇمىلدىرىلعان.
ءىس-شارا باستالعالى بەرى پوليسيا قىزمەتكەرلەرى 528 مىڭنان استام پاتەر مەن جەكە تۇرعىن ۇيلەردى ارالاپ شىقتى. ناتيجەسىندە تۇرعىلىقتى جەرىندە تىركەۋسىز تۇرىپ جاتقان 4 مىڭنان استام ازامات انىقتالىپ، ولاردىڭ بارلىعى ق ر اقبك-نىڭ 492-بابىنا سايكەس اكىمشىلىك جاۋاپكەرشىلىككە تارتىلدى. سونىمەن قاتار پروفيلاكتيكالىق ەسەپتە تۇرعان 5 مىڭ 363 ادام تەكسەرىلدى. ونىڭ ىشىندە وتباسى-تۇرمىستىق قاتىناستار سالاسىندا قۇقىق بۇزۋشىلىق جاساعاندار، سونداي-اق ازاماتتىق قارۋدىڭ 36 مىڭ 335 يەسى تەكسەرىلدى. ولارعا پروفيلاكتيكالىق اڭگىمە جۇرگىزىلدى.
– پوليسيا قىزمەتكەرلەرىنىڭ مىندەتى – ازاماتتارمەن تىعىز، سەنىمدى قارىم-قاتىناس ورناتۋ، قىلمىستاردىڭ الدىن الۋ، ولاردى انىقتاۋ، جولىن كەسۋ جانە قۇقىق بۇزۋشىلىقتاردىڭ الدىن الۋ، – دەپ اتاپ ءوتتى الماتى قالالىق پد جەرگىلىكتى پوليسيا قىزمەتى باسقارماسى باستىعىنىڭ ورىنباسارى ايتان ەلەۋسىزوۆ.