كەزدەسۋدە ەلباسىنا «Nur Otan» پارتياسى ساياسي كەڭەسىنىڭ كەڭەيتىلگەن وتىرىسىنا دايىندىق بارىسى تۋرالى اقپارات بەرىلدى.
«Nur Otan» پارتياسىنىڭ ءتوراعاسى نۇرسۇلتان نازاربايەۆ باۋىرجان بايبەكتى قابىلدادى، دەپ حابارلايدى Almaty-akshamy.kz ەlbasy.kz سايتىنا سىلتەمە جاساپ.
كەزدەسۋدە قازاقستاننىڭ تۇڭعىش پرەزيدەنتىنە «Nur Otan» پارتياسى ساياسي كەڭەسىنىڭ كەڭەيتىلگەن وتىرىسىنا دايىندىق بارىسى تۋرالى اقپارات بەرىلدى. باۋىرجان بايبەك ەلباسىعا ەل وڭىرلەرىنە جاساعان جۇمىس ساپارلارىنىڭ قورىتىندىسى، سونداي-اق «Nur Otan» پارتياسى ءماسليحاتتارداعى فراكسياسىنىڭ سايلاۋالدى باعدارلامانىڭ ورىندالۋى بويىنشا وتكىزگەن وتىرىستارى ناتيجەسى جايلى باياندادى.
«وسى جىلى ۇكىمەت مۇشەلەرىنىڭ قاتىسۋىمەن ماجىلىستەگى ءبىزدىڭ فراكسيانىڭ 3 وتىرىسى ءوتتى. جۇمىس الدىن-الا بەكىتىلگەن جوسپارعا سايكەس جۇرگىزىلۋدە. سونىمەن بىرگە 2025 جىلعا دەيىنگى «جاستار – وتانعا!» باعدارلاماسى جۇزەگە اسىرىلۋدا، قازىرگى ۋاقىتتا ءىس-شارالاردىڭ 20 پايىزى اتقارىلدى»، – دەدى «Nur Otan» پارتياسى ءتوراعاسىنىڭ ءبىرىنشى ورىنباسارى.
سونداي-اق باۋىرجان بايبەك جۋىردا وتكەن «Jastar – Otanga!» حالىقارالىق فورۋمىنىڭ ناتيجەلەرىن بايانداپ، 15 مەملەكەت وكىلدەرىنىڭ قاتىسۋىمەن حالىقارالىق پارتيالىق فورۋم ۇيىمداستىرۋ جوسپارلانىپ وتىرعانىن جەتكىزدى. سوڭىندا «Nur Otan» پارتياسىنىڭ ءتوراعاسى ورتالىق اپپاراتقا جانە پارتيانىڭ وڭىرلىك فيليالدارىنا ساياسي كەڭەستىڭ كەڭەيتىلگەن وتىرىسىن وتكىزۋگە دايىندىقتى جالعاستىرۋدى تاپسىردى.