نۇرلان ەرمەكبايەۆ كەشىرىم سۇرادى
قازاقستان پرەزيدەنتى – جوعارعى باس قولباسشى قاسىم-جومارت توقايەۆ قورعانىس مينيسترلىگىنىڭ باسشىلىق قۇرامىمەن كەزدەسۋ وتكىزىپ، جاڭادان تاعايىندالعان مينيستر مۇرات بەكتانوۆتى تانىستىردى، دەپ حابارلايدى Almaty-akshamy.kz.
مەملەكەت باسشىسى جاڭا ءمينيستردىڭ ءبىلىمى مەن تاجىريبەسى قارۋلى كۇشتەرگە جۇكتەلەتىن مىندەتتەردى ورىنداۋعا سەپتىگىن تيگىزەتىنىنە سەنىم ءبىلدىردى. قاسىم-جومارت توقايەۆ اسكەر الەمدەگى جانە ايماقتاعى كۇردەلى جاعدايدا كەز كەلگەن سىرتقى قاۋىپ-قاتەرگە تويتارىس بەرۋگە، مەملەكەتىمىزدىڭ قاۋىپسىزدىگىن قامتاماسىز ەتۋگە دايىن بولۋى كەرەك ەكەنىن ايتتى.
پرەزيدەنت ارىس پەن جامبىل وبلىسىنىڭ بايزاق اۋدانىنداعىداي توتەنشە وقيعالارعا جول بەرمەۋدىڭ اسا ماڭىزدى ەكەنىنە توقتالدى. بۇل رەتتە جوعارعى باس قولباسشى ءوق-دارى قويمالارىنداعى قاۋىپسىزدىكتى قامتاماسىز ەتۋ جونىندە بەرگەن تاپسىرماسىن اسكەريلەردىڭ ەسىنە سالىپ، بۇل باعىتتا ءبىرقاتار جۇمىستار جاسالعانىن، دەگەنمەن ءالى دە شەشىمىن كۇتكەن ءتۇيىندى ماسەلەلەردىڭ بار ەكەنىن اتاپ ءوتتى. مەملەكەت باسشىسى قورعانىس مينيسترلىگىنە ءبىرقاتار مىندەت جۇكتەدى. قاسىم-جومارت توقايەۆ ق ر قارۋلى كۇشتەرىن دامىتۋدىڭ 2030 جىلعا دەيىنگى تۇجىرىمداماسىن تولىقتاي جۇزەگە اسىرۋ قاجەت ەكەنىنە، اسكەري قاۋىپسىزدىكتىڭ سىن-قاتەرلەرىنە شۇعىل ارەكەت ەتۋ ءۇشىن باسقارۋ ورگاندارىنىڭ دايىندىق ءىس-شارالارىن جالعاستىرا بەرۋگە نازار اۋداردى.
پرەزيدەنت قارۋلى كۇشتەردى جابدىقتاۋ بويىنشا مىندەتتەمەلەردى ورىنداۋ بارىسىندا وتاندىق قورعانىس ونەركاسىبى كەشەنىمەن كەلىسىپ جۇمىس ىستەۋدى تاپسىردى. سونىمەن قاتار وفيسەرلەر مەن كەلىسىم-شارت بويىنشا الىناتىن قىزمەتكەرلەرگە ساپالى دايىندىق جۇرگىزۋدى قامتاماسىز ەتۋگە، وفيسەرلەر مەن گەنەرالدار قاتارىندا سىبايلاس جەمقورلىققا جول بەرمەۋگە شاقىردى. جوعارعى باس قولباسشى ءوق-دارى ساقتايتىن بارلىق قويمالاردا جانە باسقا دا قارۋ-جاراق ساقتايتىن جەرلەردە قاۋىپسىزدىكتى قامتاماسىز ەتۋ جونىندە تۇبەگەيلى شەشىم قابىلداۋدى، سونداي-اق ەلدى مەكەندەردەن الىس جەردە ءوق-دارى ساقتايتىن زاماناۋي قويمالار سالۋ جۇمىستارىن جىلدامداتۋدى تاپسىردى. بۇعان قاجەتتى قاراجات «ءقاۋىپسىز ەل» ۇلتتىق جوباسىنان قاراستىرىلۋى ءتيىس. مەملەكەت باسشىسى جيىن سوڭىندا جاڭا مينيسترگە جانە بارلىق اسكەريلەرگە اسا جاۋاپتى قىزمەتتە تابىس تىلەدى.
تاعايىندالعان مينيستر مۇرات بەكتانوۆ ۇكىمەت مۇشەسى رەتىندە انت قابىلدادى. جيىن بارىسىندا وتستاۆكاعا كەتكەن بۇرىنعى مينيستر نۇرلان ەرمەكبايەۆ ءسوز سويلەپ، پرەزيدەنتتەن، جامبىل وبلىسىنىڭ بايزاق اۋدانىندا بولعان قايعىلى وقيعادان قازا تاپقانداردىڭ اعايىن-تۋىسىنان جانە زارداپ شەككەندەردەن كەشىرىم سۇرادى.