ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ 17-18 ناۋرىزدا حالىقارالىق بايقاۋشىلارمەن ءبىرقاتار كەزدەسۋ وتكىزدى، دەپ حابارلايدى Almaty-akshamy.kz وسك سايتىنا سىلتەمە جاساپ.
بۇل كۇنى ول ءازىربايجان، مولدوۆا، موڭعوليا وسك توراعالارىمەن، تۇركيا رەسپۋبليكاسى وسك مۇشەلەرىمەن، سونداي-اق شانحاي ىنتىماقتاستىق ۇيىمىنىڭ، ۇقشۇ پارلامەنتتىك اسسامبلەياسىنىڭ، تۇركى مەملەكەتتەرى ۇيىمىنىڭ جانە تۇركى پارلامەنتتىك اسسامبلەياسىنىڭ دەلەگاسيالارىمەن كەزدەستى.
ورتسايلاۋكوم ءتوراعاسى دەلەگاسيا مۇشەلەرىنە قازاقستان رەسپۋبليكاسى پارلامەنتى ءماجىلىسى جانە ءماسليحاتتارى دەپۋتاتتارىنىڭ كەزەكتەن تىس سايلاۋىن ازىرلەۋ مەن وتكىزۋ جونىندەگى ءىس-شارالاردىڭ كۇنتىزبەلىك جوسپارىن ۇسىندى، كەزدەسۋلەرگە قاتىسۋشىلاردى سايلاۋ زاڭناماسىنداعى رەفورمالاردىڭ ىسكە اسىرىلۋ بارىسىمەن تانىستىردى، سونداي-اق كانديداتتاردى جانە ساياسي پارتيالاردىڭ پارتيالىق تىزىمدەرىن تىركەۋ قورىتىندىلارى تۋرالى حاباردار ەتتى.
كەزدەسۋلەر اياسىندا نۇرلان ءابدىروۆ سايلاۋشىلار تىزىمىنە ەنگىزىلگەن قازاقستان ازاماتتارىنىڭ، ەلدەگى سايلاۋ ۋچاسكەلەرىنىڭ سانى جانە الداعى سايلاۋعا حالىقارالىق بايقاۋشىلاردى اككرەديتتەۋ قورىتىندىلارى تۋرالى ايتتى.
وسك ءتوراعاسى حالىقارالىق بايقاۋشىلارعا ولاردىڭ شاقىرتۋعا جاۋاپ بەرىپ، سايلاۋ پروسەسىنە مونيتورينگ جۇرگىزۋ ءۇشىن قازاقستانعا كەلگەندەرى ءۇشىن العىسىن ءبىلدىردى. نۇرلان ءابدىروۆ ەلىمىزدە سايلاۋدىڭ ۇلتتىق زاڭناماعا جانە حالىقارالىق ستاندارتتارعا سايكەس ءوتۋى ءۇشىن بارلىق شارالار قابىلدانىپ جاتقانىن اتاپ ءوتتى.
ول سونداي-اق، ورتسايلاۋكوم ۇلتتىق زاڭناماعا جانە جوعارى دەموكراتيالىق ستاندارتتارعا سايكەس ەركىن جانە ءادىل سايلاۋ وتكىزۋ ءۇشىن بارلىق قاجەتتى شارالاردى قابىلداپ جاتقانىن، سونداي-اق الداعى سايلاۋدى بايقاۋدى 12 حالىقارالىق ۇيىم مەن 41 ەلدەن 793 بايقاۋشى جۇزەگە اسىراتىنىن جەتكىزدى.
ءوز كەزەگىندە، دەلەگاسيا وكىلدەرى كانديداتتاردى ۇسىنۋ جانە تىركەۋ كەزەڭدەرى بويىنشا ناقتىلايتىن سۇراقتار قويىپ، سايلاۋ پروسەسىن ۇيىمداستىرۋدىڭ جوعارى دەڭگەيىن اتاپ كورسەتتى.
18 ناۋرىزدا ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ بەلارۋس جانە رەسەي وداعى پارلامەنتتىك جينالىسى دەلەگاسياسىنىڭ وكىلدەرىمەن، تاجىكستاننىڭ سايلاۋ جانە رەفەرەندۋمدار جونىندەگى ورتالىق كوميسسياسىنىڭ ءتوراعاسى باحتيەر حۋدوەرزودامەن كەزدەسۋلەر وتكىزدى جانە تمد پارلامەنتارالىق اسسامبلەياسىنىڭ حالىقارالىق بايقاۋشىلار توبىمەن كەزدەستى.
ول قوناقتاردى الداعى پارلامەنت ءماجىلىسى دەپۋتاتتارىنىڭ سايلاۋىنا ازىرلىك پەن وتكىزۋ بارىسى، سونداي-اق سايلاۋ ۋچاسكەلەرىنىڭ داۋىس بەرۋ كۇنىنە دايىندىعى تۋرالى قىسقاشا حاباردار ەتتى، كەزدەسۋلەرگە قاتىسۋشىلاردىڭ سايلاۋدى ۇيىمداستىرۋ مەن وتكىزۋگە، ولاردىڭ قورىتىندىلارىن شىعارۋ مەرزىمدەرى مەن تارتىبىنە قاتىستى سۇراقتارىنا جاۋاپ بەردى.
كەزدەسۋلەر بارىسىندا وسك ءتوراعاسى ەلىمىزدە حالىقارالىق بايقاۋشىلاردىڭ الداعى سايلاۋعا قاتىسۋىنا، ونىڭ ىشىندە قازاقستاننىڭ دەموكراتيالىق دامۋىن قولداۋدىڭ بەلگىسى رەتىندە ماڭىزدى ءمان بەرىلەتىنىن اتاپ ءوتتى.
دەلەگاسيالاردىڭ باسشىلارى سايلاۋ قارساڭىندا ەلىمىزدەگى تىنىش، اقپەيىلدى جاعدايدى، سايلاۋ ناۋقانىن ۇيىمداستىرۋشىلار دايىندىعىنىڭ جوعارى كاسىبي دەڭگەيىن اتاپ ءوتىپ، داۋىس بەرۋ كۇنى بايقاۋدى وبەكتيۆتى جانە بەيتاراپ جۇزەگە اسىرۋعا دايىن ەكەندىكتەرىن ءبىلدىردى.
سونداي-اق، 18 ناۋرىزدا نۇرلان ءابدىروۆ يىۇ باس حاتشىلىعى ساياسي دەپارتامەنتىنىڭ ەلشىسى سەيد شەيح سەيد حاسسان شاريف باستاعان يسلام ىنتىماقتاستىعى ۇيىمىنىڭ دەلەگاسياسىمەن كەزدەسۋ وتكىزدى.
كەزدەسۋ بارىسىندا ورتسايلاۋكوم باسشىسى قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنا ازىرلىك پەن وتكىزۋ بارىسى تۋرالى حاباردار ەتتى، دەپۋتاتتىققا كانديداتتاردى تىركەۋ قورىتىندىلارى تۋرالى قىسقاشا ايتىپ بەردى، سونداي-اق كانديداتتاردى تىركەۋدىڭ بارلىق راسىمدەرى كونستيتۋسيالىق نورمالارعا سايكەس جاريالىلىق جانە اشىقتىق قاعيداتتارىندا جۇرگىزىلگەنىن اتاپ ءوتتى. سايلاۋ كوميسسيالارى ازاماتتاردىڭ كونستيتۋسيالىق قۇقىقتارىن ىسكە اسىرۋ ءۇشىن قاجەتتى شارالار قابىلدادى.
نۇرلان ءابدىروۆ يسلام ىنتىماقتاستىعى ۇيىمىنىڭ دەلەگاسياسى ەلىمىزدەگى سايلاۋ پروسەستەرىن بايقاۋعا ءبىرىنشى رەت قاتىسىپ وتىرعانىن مالىمدەدى. ول سونداي-اق، حالىقارالىق بايقاۋشىلارعا ولاردىڭ شاقىرتۋعا جاۋاپ بەرىپ، سايلاۋ پروسەسىنە مونيتورينگ جۇرگىزۋ ءۇشىن قازاقستانعا كەلگەندەرى ءۇشىن العىسىن ءبىلدىردى.
وسك ءتوراعاسى سايلاۋ كوميسسيالارى سايلاۋدىڭ ۇلتتىق زاڭناماعا جانە حالىقارالىق ستاندارتتارعا سايكەس ءوتۋى ءۇشىن بارلىق شارالاردى قابىلداپ جاتقانىن اتاپ ءوتتى.