قازاقستان رەسپۋبليكاسى پرەزيدەنتى قاسىم-جومارت توقايەۆتىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا كەزەكتى رەت جولدانعان جولداۋىنا وراي قازاقستان جازۋشىلار وداعىندا جيىن ءوتتى.
جيىنعا ەلگە جانە الىس-جاقىن شەتەلگە ايگىلى اقىن-جازۋشىلار، مادەنيەت، ءتىل، عىلىم سالاسىنىڭ مايتالماندارى، زيالى قاۋىم وكىلدەرى جانە ت.ب. قاتىستى.
باسقوسۋدىڭ ماقساتى - ەلدەگى ءادىل قوعامنىڭ ورناۋىنا اتسالىسىپ، حالىقتىڭ الەۋمەتتىك-مادەني تۇرمىس ساپاسىن جاقسارتۋ.
جيىندى قازاقستان جازۋشىلار وداعىنىڭ ءتوراعاسى مەرەكە قۇلكەنوۆ جۇرگىزدى.
سونىمەن قاتار جيىنعا قاتىناسۋشىلار جولداۋدىڭ حالىققا پايدالى جاقتارىن ايتىپ، ءتيىمدى تۇستارىن ورتاعا سالدى. ەلدە ەلەكتر تاپشىلىعىن شەشۋگە باعىتتالعان اتوم ەلەكتر ستانسياسىن سالۋ جونىندەگى رەفەرەندۋم تۋرالى دا وي قوزعالدى.
«بۇل جولعى جولداۋ باسقاسىنان وزگەرەك بولدى. سونداي-اق 9 باسىم باعىتقا قاراي نەگىزدەلگەن. ءار سالادا شەشىمىن تابۋى قاجەت دۇنيەلەر بار. وسى جولعى جولداۋدا اتالعان ماسەلەلەرگە تولىق جاۋاپ بەرىلگەن. ءبىزدىڭ قالامگەرلەر وسىندايدا ءۇن قوسىپ، قوعامدىق ىستەرگە بەلسەندى بولعانىمىز ءجون. سونىمەن قوسا اەس، رەفەرەندۋم شەت قالماۋى ءتيىس. بارىمىزگە بەلسەندىلىك كەرەك»، - دەدى قازاقستان جازۋشىلار وداعىنىڭ ءتوراعاسى مەرەكە قۇلكەنوۆ.
سونىمەن بىرگە جولداۋ ازاماتتاردىڭ ءومىر ءسۇرۋ ساپاسىن جاقسارتىپ قانا قويماي، ۇلكەن ىستەرگە ءىزاشار بولاتىنىنى ايتىلدى.
«جولداۋدى تۇگەل وقىپ شىقتىق. بۇقارالىق اقپارات قۇرالدارىنا ءوز وي-پىكىرلەرىمىزدى ءبىلدىرىپ كەلەمىز. كرەاتيۆتى يندۋستريا دەگەن يگى باستاما كوتەرىلدى. جالپى حالىق ىنتىماق بىرلىكپەن قيمىلداسا ءىس ونەدى»، - دەدى جازۋشى-دراماتۋرگ ءسۇلتانالى بالعابايەۆ.