6 قازان كۇنى ەلىمىزدە اەس قۇرىلىسى جونىندەگى جالپىحالىقتىق رەفەرەندۋم وتەدى. پرەزيدەنت توقايەۆ پارمەن بەرىپ، قازاقستان قوعامى ءۇشىن اسا ماڭىزعا يە وسى ەلەكتورالدى پروسەسس بەكىتىلدى.
اەس قۇرىلىسىنا قاتىستى قوعام پىكىرى ءارتۇرلى. ونى قولداۋشىلار دا، وعان قارسىلار دا بار، جانە تاراپتار ءوز پىكىرلەرىن قوعام تالقىسىنا اشىق سالۋدا. دەسە دە، «اەس قۇرىلىسى تۋرالى شەشىمدى رەفەرەندۋم ارقىلى، حالىق پىكىرىمەن ساناسا وتىرىپ قابىلدايمىز»، - دەگەن ساياسي بيلىك ماڭىزدى ساياسي ناۋقاندى باستاپ كەتتى.
كەز كەلگەن ساياسي ناۋقاننىڭ تاعى ءبىر اجىراماس بولىگى – تاۋەلسىز باقىلاۋشىلار ەكەنى انىق. تاۋەلسىز باقىلاۋشىسىز وتكەن سايلاۋدى زاڭدى، ادىلەتتى ءارى شىنايى دەپ ايتۋ قيىن.
رەفەرەندۋمعا بايلانىستى ەل بويىنشا باقىلاۋشىلىق جاسايتىن ۇيىمدار مەن باستاماشىل توپتاردىڭ سانى ارتۋدا. باقىلاۋشىلىق جاسايمىز دەپ باستاما كوتەرگەندەردىڭ ءبىرى – ساياساتتانۋشى نۇربولات نىشانباي بولدى.
ساياساتتانۋشى نۇربولات نىشانباي ءوزىنىڭ الەۋمەتتىك جەلىدەگى پاراقشاسىندا «باقىلاۋ قىراندارى» اتتى تاۋەلسىز باقىلاۋشىلار توبىن جاساقتايتىنىن حابارلادى.
«ساياساتتانۋشى رەتىندە ماعان ەلىمىزدەگى، قوعامداعى ءاربىر پروسەسس قىزىقتى ءارى ماڭىزدى. ازاماتتاردىڭ ساياسي بەلسەندىلىگى، ازاماتتىق قوعامنىڭ قالىپتاسۋىنا ىقپالى، سايلاۋعا حالىقتىڭ قانشالىقتى بەلسەندى قاتىسۋى مەن ءۇشىن ءاردايىم ماڭىزدى.
جەكە تاجىريبەمدە الەمنىڭ ءبىرقاتار ەلىندە بولدىم، وقىدىم، تاجىريبە الماستىم. ۇققانىم، دامىعان كەز-كەلگەن ءبىرتۇتاس قوعام ءۇشىن سايلاۋ، رەفەرەندۋم مەملەكەتتىك دەڭگەيدە ماڭىزدى شارا. ەۋروپادا وقىدىم، مۇحيتتىڭ ارعى جاعىنداعى اۆستراليادا ءبىلىم الدىم. تەك ءبىلىم الىپ قانا قويماي، جەرگىلىكتى حالىقتىڭ تۇرمىس-سالتتارى مەن الەۋمەتتىك بەلسەندىلىگىن دە مەڭگەردىم»، - دەگەن ساياساتتانۋشى ەۋروپا ەلدەرىنىڭ ەلەكتورالدى پروسەستەرىنەن العان تاجىريبەسى مەن قازاقستانداعى ساياسي ناۋقانداردى سالىستىرا وتىرىپ، الدا بولاتىن رەفەرەندۋمدا تاۋەلسىز باقىلاۋشىلار توبىن جاساقتايتىنىن ايتتى.
«ەندى ءۇش اپتادان كەيىن ەلىمىزدە رەفەرەندۋم وتەدى. بۇل رەفەرەندۋمنىڭ ماڭىزى دا، ءمانى دە وزگەشە. سەبەبى، وسىعان دەيىنگى رەفەرەندۋمدار پرەزيدەنت مەرزىمىن ۇزارتۋ، كونستيتۋسياعا قاتىستى بولسا، بۇل جولى اەس سالىنا ما، جوق پا دەگەن سۇراققا حالىق تاڭداۋ جاسايدى. ساياساتتانۋشى بولعاندىقتان، مۇنداي پروسەستەردەن تىس قالا المايمىز»، - دەيدى ساياساتتانۋشى.
رەفەرەندۋم كۇنى رەسمي بەكىتىلگەننەن باستاپ ەلىمىزدىڭ تۇكپىر-تۇكپىرىندە، سونىڭ ىشىندە الماتى، استانا سەكىلدى قازاقستان ساياساتىنىڭ ماڭىزدى درايۆەرلەرىندە ساياسي ناۋقانداردى (سايلاۋ، رەفەرەندۋم) باقىلايتىن ۇيىمدار بەلسەندىلىگىن ارتتىرۋدا.
«ساياساتتانۋشى رەتىندە بيىلعى ساياسي ناۋقاندا باقىلاۋشىلاردى دايىنداپ، رەفەرەندۋمنىڭ ءوتۋ بارىسىن قاداعالاۋ تۋرالى يدەيا ۇسىنامىن. ماقسات – رەفەرەندۋمدى دەموكراتيالىق ينستيتۋت رەتىندە قالىپتاستىرۋدا ۇلەس قوسۋ. بۇل مەن ءۇشىن ۇلكەن تاجىريبە بولماق. باستى مىندەتىمىز – رەفەرەندۋمنىڭ ءوتۋ بارىسىن باقىلاۋ. ءقازىر بۇل قوعامدىق باقىلاۋدى قالاي جۇزەگە اسىرا الامىز دەپ كۇنى-تۇنى ويلانىپ، قۇرىلىمى مەن ستراتەگياسىن قالىپتاستىرۋدامىز»، - دەيدى ول.