باس پروكۋراتۋرا بولات نازاربايەۆتىڭ ۇلى نۇربول نازاربايەۆتىڭ ەلدەن زاڭسىز شىعارعان اكتيۆتەرىن تەكسەرەدى، - دەپ حابارلايدى aqshamnews.kz ءتىلشىسى.
بۇل تۋرالى دەپۋتات رينات زايىتتىڭ دەپۋتاتتىق ساۋالىنا جاۋاپ بەرگەن باس پروكۋرور بەرىك اسىلوۆ ءمالىم ەتتى.
رينات زايىت ءوز ساۋالىندا نۇربول نازاربايەۆتان وسى ۋاقىتقا دەيىن ءبىراز اكتيۆ قايتارىلعانىن ايتقان ەدى.
"بولات نازاربايەۆتىڭ ۇلى نۇربول نازاربايەۆ سوت شەشىمىمەن 57 ميلليارد تەڭگە كولەمىندەگى اكتيۆىنەن ايىرىلىپ، مەملەكەت مەنشىگىنە قايتارىلدى. سونىمەن بىرگە، وعان 925 ميلليون تەڭگە ايىپپۇل جانە 230،4 ميلليون تەڭگە ايىپاقى سالىندى. ەڭ باستىسى، ونىڭ بارلىق بانك شوتتارى بۇعاتتالىپ، كومپانيا كىرىسىن جانە جەكە مۇلكىن باسقارۋ قۇقىعىنان ايىرىلدى. بۇل اۋلەتتىڭ رەيدەرلىك جولمەن يەلەنگەن بازارلارى، سونداي-اق، الماتى قالاسى مەن وبلىسىندا زاڭسىز العان جەر تەلىمدەرى تۋرالى قوعامدا ءتۇرلى دەرەكتەر ايتىلىپ ءجۇر. اسىرەسە اتىشۋلى "التىن وردا" بازارىنا قاتىسى ءجيى ءسوز بولادى. الايدا اتالعان نىسانداردىڭ جوعارىدا تاركىلەنگەن اكتيۆتەردىڭ قاتارىندا بار-جوعى ازىرگە بەلگىسىز. سەبەبى بۇل ماسەلەلەردىڭ ناقتى جايجاپسارى اشىق تۇردە جاريالانباعان"، - دەگەن زايىت باس پروكۋرورعا بىرنەشە ساۋال قويعان ەدى.
سونىڭ ىشىندە،
- نۇربول نازاربايەۆتىڭ يەلىگىندەگى كومپانيالار مەن اكتيۆتەرگە تۇگەندەمە جۇرگىزىپ، ونىڭ زاڭدىلىعىن انىقتاۋ، زاڭسىزدارىن مەملەكەت مەنشىگىنە قايتارۋ؛
- اتالعان قايتارىلعان زاڭسىز اكتيۆتەر جانە ولاردىڭ پايدالانىلۋى بويىنشا تولىق اقپاراتتى جۇرتشىلىققا قولجەتىمدى ەتۋ؛
- "التىن وردا" بازارى جانە الماتى قالاسى مەن وبلىسىنداعى زاڭسىز يەلەنگەن جەر تەلىمدەرى بويىنشا تەرگەۋدى باستاۋ.
بۇل دەپۋتاتتىق ساۋالعا جاۋاپ بەرگەن بەرىك اسىلوۆ جالپى، ەلگە قايتارىلعان اكتيۆتەر تۋرالى ەسەپ بەرگەن.
"زاڭسىز يەمدەلگەن اكتيۆتەردى مەملەكەتكە قايتارۋ ماسەلەلەرى جونىندەگى كوميسسيانىڭ (بۇدان ءارى - كوميسسيا) شەشىمى بويىنشا بۇگىنگى كۇنى 1،3 ترلن تەڭگە كولەمىندە شارالار قابىلداندى. زاڭ سۋبەكتىلەرىمەن جاسالعان كەلىسىمدەرگە سايكەس مەملەكەت پايداسىنا ەرىكتى تۇردە شامامەن 750 ملرد تەڭگە قاراجات اۋدارىلىپ، 103 ملرد تەڭگەگە مۇلىك زاتتاي تۇردە تاپسىرىلدى. قايتارىلعان قاراجات ەسەبىنەن 400-دەن استام الەۋمەتتىك نىساننىڭ قۇرىلىسى باستالدى، ونىڭ ىشىندە 220 سۋمەن جابدىقتاۋ جانە كوممۋنالدىق ينفراقۇرىلىم نىسانى، 177 مەديسينالىق مەكەمە، 14 ءبىلىم بەرۋ جانە سپورت نىساندارى بار. 68 نىساننىڭ قۇرىلىسى اياقتالدى (دەنساۋلىق ساقتاۋ سالاسىندا – 64، سۋمەن جابدىقتاۋ – 3 جانە سپورت – 1). بۇدان بولەك، زاڭ سۋبەكتىلەرىمەن جاسالعان كەلىسىمدەر نەگىزىندە ولار ءوز بەتىنشە سايكەسىنشە 5،2 ترلن تەڭگەگە جانە 121 ملرد تەڭگەگە ينۆەستيسيالىق جانە الەۋمەتتىك جوبالاردى ىسكە اسىرۋدى باستادى. اتالعان جوبالار ۇلتتىق ەكونوميكانىڭ ورنىقتى دامۋىنا جانە ازاماتتاردىڭ ءومىر ءسۇرۋ ساپاسىن ارتتىرۋعا باعىتتالعان"، - دەپ جاۋاپ بەرگەن اسىلوۆ.
ونىڭ سوزىنە سەنسەك، نۇربول نازاربايەۆتىڭ اكتيۆتەرى قازاقستانعا كۇشتەپ قايتارىلعان 112 ملرد تەڭگەنىڭ ىشىندە بار. ءبىراق، ناقتى قاي كومپانيالارى ەكەنى قۇپيا دەيدى اسىلوۆ.
"سونىمەن بىرگە، 112 ملرد تەڭگەگە اكتيۆتەردى مەملەكەت پايداسىنا ءماجبۇرلى تۇردە قايتارۋ جونىندە شارالار قابىلداندى. اكتيۆتەردى قايتارۋ جونىندەگى جۇمىس ناتيجەلەرى زاڭمەن قورعالاتىن قۇپيانى ساقتاۋ تالاپتارى ەسكەرىلە وتىرىپ، بۇقارالىق اقپارات قۇرالدارىندا تۇراقتى تۇردە جاريالانىپ وتىرادى. زاڭ شەڭبەرىندەگى جۇمىسپەن ءسىزدىڭ ساۋالىڭىزدا كورسەتىلگەن تۇلعا دا قامتىلعان. دەگەنمەن، زاڭنىڭ 8-بابىنىڭ 3-تارماعىنا سايكەس اكتيۆتەردى قايتارۋ جونىندەگى ۋاكىلەتتى ورگان جانە كوميسسيانىڭ مۇشەلەرى الىنعان مالىمەتتەردىڭ ساقتالۋىن جانە قۇپيالىلىعىن قامتاماسىز ەتۋگە مىندەتتى. ءسىز كورسەتكەن اقپارات اكتيۆتەردى زاڭسىز يەمدەنۋگە، شىعارۋعا قارسى ءىس-قيمىل جاساۋ جانە ولاردى قايتارۋ بارىسىنداعى جۇمىستا ەسكەرىلەدى"، - دەپ جاۋاپ بەرگەن اسىلوۆ ماڭىزدى ماسەلە كوتەرگەن زايىتقا العىس ايتقان.