نۇر-سۇلتاندا بيرجا كوميتەتىنىڭ احۋالدىق ورتالىعى اشىلدى
ەلوردادا مەملەكەت باسشىسىنىڭ تاپسىرماسىن ورىنداۋ اياسىندا ۇيىمداستىرىلعان ق ر باسەكەلەستىكتى قورعاۋ جانە دامىتۋ اگەنتتىگى جانىنداعى بيرجا كوميتەتىنىڭ احۋالدىق ورتالىعى ءوز جۇمىسىن باستادى، دەپ حابارلادى Almaty-akshamy.kz. ق ر پرەمەر-مينيستردىڭ سايتىنا سىلتەمە جاساي وتىرىپ.
احۋالدىق ورتالىق بيرجالىق ساۋدا-ساتتىق بارىسىن ونلاين رەجيمدە قاداعالاۋ، بيرجالىق جانە بيرجادان تىس باعا بەلگىلەنىمدەرىنە مونيتورينگ جۇرگىزۋ جانە بيرجالىق ساۋداعا مونوپولياعا قارسى تالاپتاردى ساقتاۋ ءۇشىن قۇرىلدى. احۋالدىق ورتالىقتىڭ اشىلۋىنا ق ر پرەمەر-مينيسترىنىڭ ورىنباسارى رومان سكليار قاتىستى. ول ءبىرقاتار تاۋارلاردىڭ ساۋدا-ساتتىعىن ىسكە قوسۋ بويىنشا بيرجالىق كوميتەتتىڭ اتقارعان جۇمىسىنىڭ تيىمدىلىگىن اتاپ ءوتىپ، قىسقا مەرزىمدە ساۋدا تەتىكتەرىن ودان ءارى جەتىلدىرۋ، نارىققا قاتىسۋشىلاردى تارتۋ جانە وقىتۋ ماسەلەلەرىن شەشۋ مىندەتىن قويدى. احۋالدىق ورتالىقتىڭ اشىلۋىنا ساۋدا جانە ينتەگراسيا ءمينيسترى باقىت سۇلتانوۆ، ەنەرگەتيكا ۆيسە-مينيسترى اسەت ماعاۋوۆ، وتاندىق جانە حالىقارالىق تاۋار بيرجالارىنىڭ وكىلدەرى قاتىستى. تۇساۋكەسەر بارىسىندا قازاقستاننىڭ ءىرى تاۋار بيرجالارىنىڭ باسشىلارى جانارماي، بيتۋم، كوممۋنالدىق-تۇرمىستىق كومىردىڭ شاعىن پارتيالارى ساۋداسىنىڭ ناتيجەلەرىن ۇسىندى، ولاردى ساتۋ بيرجالىق پلاتفورمالار ارقىلى العاش رەت 2021 جىلى باستالدى. وسىلايشا، كوممۋنالدىق-تۇرمىستىق كومىردى تاۋار بيرجالارى ارقىلى ساتۋ تەتىگى دەلدالداردىڭ سانىن قىسقارتۋعا مۇمكىندىك بەردى جانە وڭىرلىك وپەراتورلاردىڭ كومىردى رازرەزدەردىڭ وزىنەن ساتىپ الۋعا تىكەلەي قول جەتكىزۋىن قامتاماسىز ەتتى، بۇل حالىق ءۇشىن وتىننىڭ وسى ءتۇرىنىڭ تۇپكىلىكتى قۇنىن تومەندەتۋگە مۇمكىندىك بەرەدى. العاشقى ساۋدا-ساتتىق ناتيجەلەرى بويىنشا تاۋار بيرجالارى ارقىلى 51 ملن تەڭگەدەن استام سوماعا «قاراجىرا» اق وندىرگەن 9 100 توننا (80%) كومىر ساتىلدى، وعان 8 وڭىرلىك تۇيىقتاردىڭ ساتىپ الۋشىلارى قاتىستى. «شۇباركول كومىر» اق كەنىشىنەن 703 ملن تەڭگەدەن استام سوماعا 89 080 توننا (60%) ساتىلدى، ساۋداعا 15 وڭىرلىك تۇيىقتاردىڭ ساتىپ الۋشىلارى قاتىستى.