الماتىنىڭ قىسى قالىڭ قارىمەن ەرەكشەلەنىپ، تۇرعىنداردىڭ كۇندەلىكتى ومىرىنە ەلەۋلى قيىندىقتار تۋعىزاتىنى بەلگىلى. وسىعان وراي، نۇر-مۇباراك ەگيپەت يسلام مادەنيەتى ۋنيۆەرسيتەتىنىڭ پرورەكتورى، PhD دوكتور ەرشات وڭعاردىڭ باستاماسىمەن ۋنيۆەرسيتەت اۋماعىن جانە جاقىن ماڭداعى كوشەلەردى قاردان تازارتۋ ماقساتىندا قىسقى سەنبىلىك ۇيىمداستىرىلدى، دەپ حابارلايدى aqshamnews.kz
بۇل شارانىڭ باستى ماقساتى – ۋنيۆەرسيتەت ۇجىمىن، ستۋدەنتتەر مەن وقىتۋشىلاردى ورتاق ىسكە جۇمىلدىرۋ، سونداي-اق مەشىتكە كەلۋشىلەر مەن قالا تۇرعىندارىنا قولايلى جاعداي جاساۋ بولدى.
قاتال اۋا رايىنا قاراماستان، سەنبىلىككە 100-دەن استام ادام بەلسەنە قاتىستى. ستۋدەنتتەر، وقىتۋشىلار جانە مەشىت قىزمەتكەرلەرى وقۋ كەشەنى اۋماعىن قاردان تازارتىپ، كورشى كوشەلەر مەن اۋلالاردى دا نازاردان تىس قالدىرمادى. بۇل ىزگى ءىس-شارا جەرگىلىكتى تۇرعىنداردىڭ ريزاشىلىعىن تۋدىرىپ، ولار ۋنيۆەرسيتەت ۇجىمىنا العىستارىن ءبىلدىردى.
پرورەكتور ەرشات وڭعار سەنبىلىكتىڭ ماڭىزدىلىعىنا توقتالىپ:
«يسلام – تازالىق ءدىنى. قاسيەتتى قۇران مەن پايعامبارىمىزدىڭ (وعان اللانىڭ يگىلىگى مەن سالەمى بولسىن) حاديستەرىندە تازالىقتىڭ ەرەكشە ورىن الاتىنى ايتىلعان. «تازالىق – يماننىڭ جارتىسى» دەگەن حاديس مۇسىلمان ءومىرىنىڭ نەگىزىن ايقىندايدى. سونىمەن قاتار، «كورشى اقىسى – قۇداي اقىسى» دەگەن ءسوز كورشىگە كومەك كورسەتۋدىڭ مۇسىلماندىق مىندەت ەكەنىن ەسكە سالادى»، – دەپ اتاپ ءوتتى.
بۇل سەنبىلىك بارىسىندا نۇر-مۇباراك ۋنيۆەرسيتەتىنىڭ ۇجىمى اۋىزبىرشىلىكتىڭ، ىنتىماقتىڭ جانە ورتاق ىسكە دەگەن ادالدىقتىڭ جارقىن ۇلگىسىن كورسەتتى. ءىس-شارا قالا تۇرعىندارىنا يسلام ءدىنىنىڭ تازالىققا ەرەكشە ءمان بەرەتىنىن ءىس جۇزىندە دالەلدەدى جانە ولاردى دا يگى ىستەرگە شابىتتاندىردى.