ارمەنيالىق ءانشى «جاڭا تولقىن-2021» بايقاۋىنىڭ جەڭىمپازى اتاندى
سوچيدە وتكەن «نوۆايا ۆولنا - 2021» مۋزىكالىق بايقاۋىنىڭ قورىتىندى كونسەرتى ءوتتى، دەپ حابارلايدى almaty-akshamy.kz Dimashnews.com سايتىنا سىلتەمە جاساپ.
فەستيۆالدى قورىتىندىلايتىن سالتاناتتى كەشتى لەونيد اگۋتين «سوچي» انىمەن اشتى. مەرەكەلىك باعدارلاماعا سەرگەي لازاريەۆ، اني لوراك، گريگوريي لەپس، الەكساندر پانايوتوۆ، نيكولاي باسكوۆ، كريستينا ورباكايتە، يرينا اللەگروۆا، انجەليكا ۆارۋم، سوسو پاۆلياشۆيلي، لاريسا دولينا، تايسيا پوۆاليي جانە باسقا دا تانىمال ارتىستەر قاتىستى.
«جاڭا تولقىن-2021» فەستيۆالىنىڭ قورىتىندى كونسەرتىندە تىڭدارماندارعا ديماشتىڭ ءۇشىنشى پرەمەراسى تارتۋ ەتىلدى. ديماشتىڭ ورىنداۋىنداعى ءاندى زالداعى كورەرمەن ءبىر دەممەن تىنا قالدى. زالدىڭ بارلىق كەڭىستىگى ءارتىستىڭ داۋسىمەن قامتىلدى، New Wave Hall ساحناسىنان قازاقستاندىق ءانشىنىڭ ۆوكاليزبەن ورىنداعان «Ave Maria» ماڭگىلىك تاقىرىبىنىڭ جاڭا ورىندالۋى ەستىلدى.
ديماشتىڭ ورىنداۋىنداعى ءاندى مۋزىكا اۆتورى كومپوزيتور يگور كرۋتوي ديماشتى سۇيەمەلدەدى جانە حور ارتىستەرىنىڭ داۋىسى شىعارماعا قاجەتتى اتموسفەرانى جەتكىزە ءبىلدى. كومپوزيسيا شىرقالعان كەزدە بۇكىل زال ىشتەن تىنىپ، ءبىر دەممەن تىڭدادى.
كەشتىڭ ورتاسىندا ارتىستەردىڭ ونەر كورسەتۋلەرى اراسىندا بايقاۋ جۇلدەگەرلەرى مەن جەڭىمپازدارىن ماراپاتتالدى. جارىستىڭ بارلىق فيناليستەرى مەن قازىلار القاسى ساحناعا سالتاناتتى تۇردە شاقىرىلدى.
سەرگەي لازاريەۆ «مۋز-تۆ» تەلەارناسىنىڭ ارنايى جۇلدەسىن Max Box مۋزىكانتقا جانە رەسەيدەن كەلگەن Grinkevich توبىنا «كورەرمەندەر كوزايىمى» سىيلىعىن تابىس ەتتى. لەونيد اگۋتيننىڭ قولىنان ءۇشىنشى ورىن ءۇشىن جۇلدەنى يسپانيالىق ءانشى حورحە گونسالەس الدى. ال ەكىنشى ورىن يەگەرى بولگاريادان كەلگەن جاس ءانشى دەنيسا كاراسلاۆوۆا ءوز ماراپاتىن ديماش قۇدايبەرگەننىڭ قولىنان الدى. كوپتەن كۇتكەن جەڭىستى ءسوزسىز فاۆوريت ارمەنيانىڭ وكىلى Saro Gevorgyan الدى. جەڭىمپاز قازىلار القاسىنىڭ ءتوراعاسى يگور كرۋتويدىڭ قولىنان ماراپاتقا يە بولدى.
ءداستۇر بويىنشا فينالدا «ۋحوديت پرازدنيك» ءانى شىرقالدى.
ەستەرىڭىزگە سالا كەتەيىك، مۋزىكالىق دوداعا قازاقستان اتىنان «Mezzo» كۆارتەتى قاتىسىپ، بايقاۋدىڭ العاشقى ەكى كۇنىنىڭ قورىتىندىسى بويىنشا، الدىڭعى ۇشتىكتە كورىنگەن بولاتىن.