نورۆەگيادا بىلتىر ساتىلعان ءۇش كولىكتىڭ ءبىرى ەلەكتر-كارلار. بۇل الەمدەگى ەڭ جوعارى كورسەتكىش، دەپ حابارلايدى almaty-akshamy.kz «حابار 24»-كە سىلتەمە جاساپ.
اسىرەسە نورۆەگيالىقتار Teslaنى كوپتەپ العان. امەريكالىق كومپانيا جەرگىلىكتى ەلەكتروموبيل نارىعىنىڭ 12 پروسەنتىن يەلەنىپ، نەمىستىڭ Volkswagen مەن جاپونداردىڭ «تويوتا» كولىگىن باسىپ وزعان. جالپى بىلتىر بۇل ەلدە وسى ساناتتاعى 180 مىڭ تەمىر تۇلپار ساتىلىپتى.
ساراپشىلار 2025 جىلدان باستاپ نورۆەگيا جولدارىندا، تەك ەلەكتر-كارلار مەن سۋتەگىمەن جۇرەتىن كولىكتەر بولادى دەپ بولجاپ وتىر. بۇل سكانديناۆيا ەلىندە ەلەكتر-كارلارعا سالىق مۇلدە سالىنبايدى.
– مەنىڭ ويىمشا كەلەسى جىلى ەلەكتركارلاردىڭ ۇلەسى جالپى ساتىلعان كولىكتەردىڭ 75 پروسەنتىن قۇرايتىن شىعار. سوندىقتان 2025 جىلى كولىكتەردەن تارايتىن زياندى قالدىقتار نولدىك دەڭگەيگە تۇسەدى دەپ ويلايمىن -دەيدى Nio Norway كومپانياسىنىڭ باسشىسى ماريۋس حەيلەر