ەلىمىزدىڭ نورۆەگياداعى ەلشىلىگى سكانديناۆ ەلىن ازات ەتۋ جولىندا مەرت بولعان 74 قازاقستاندىق ساربازدىڭ ەسىمىن انىقتادى.
ولار بىرنەشە اتقىشتار ديۆيزيالارىنىڭ جانە 69، 72-تەڭىز اتقىشتار بريگاداسىنىڭ قۇرامىندا سوعىسىپ، پەتسامو-كيركەنەس وپەراسياسى بارىسىندا اجال قۇشقان. تىزىمدە تۇتقىندا قازا تاپقان قازاق ساربازدارىنىڭ دا ءاتى-جونى بار. ەلشىلىك ەندى سول باتىرلاردىڭ تۋعان-تۋىستارىنا، ۇرپاقتارىنا ىزدەۋ سالادى، دەپ حابارلايدى Almaty-akshamy.kz
ەكىنشى دۇنيەجۇزىلىك سوعىس كەزىندە نەمىستەر نورۆەگياداعى لاگەرلەرگە 100 مىڭنان استام كەڭەس تۇتقىنىن اكەلىپ، قارا جۇمىسقا جەككەن. تۇتقىندا، نورۆەگيانى ازات ەتۋ كەزىندە اجال قۇشقان 15 مىڭ سارباز ەلدىڭ بىرنەشە ايماعىنداعى باۋىرلاستار زيراتىنا جەرلەنگەن. فالستاد ورتالىعىنىڭ زەرتتەۋشىلەرى سول 15 مىڭ ساربازدىڭ 7 مىڭىنىڭ ەسىمىن انىقتاپ، سايتقا جاريالادى. ەندىگى كوزدەگەندەرى - قالعان 8 مىڭ جاۋىنگەردىڭ كىم ەكەنىن انىقتاۋ.
«مەن 12-13 جىلدان بەرى وسىنى زەرتتەۋمەن اينالىسىپ ءجۇرمىن. ەسىمدەرى انىقتالعان ازاماتتاردى ۇزاق جىل ىزدەگەن تۋىستارى ءبىزدىڭ دەرەكقوردان تاۋىپ جاتسا، ءوزىمىزدى باقىتتى سانار ەدىك. كەڭەس ساربازدارى جايلى سوڭعى 15 جىلدا بىرنەشە كىتاپ جازىلدى، كورمە ۇيىمداستىردىق. ءبىزدىڭ حالىق، جاس ۇرپاق جاۋىنگەرلەردىڭ ەرلىكتەرىن ۇمىتپاۋى كەرەك»، - دەدى «فالستاد» ورتالىعىنىڭ عىلىمي زەرتتەۋشىسى ارنە لانگاس.
نورۆەگتەردىڭ اسكەري زيراتتار بازاسىنداعى دەرەكتەرىن سارالاۋدىڭ ارقاسىندا ەلىمىزدىڭ نورۆەگياداعى ەلشىلىگىنىڭ قىزمەتكەرلەرى 74 قازاقستاندىق ساربازدىڭ ەسىمىن انىقتادى. ولار - الماتى قالاسى، اقمولا، اقتوبە، جامبىل، قىزىلوردا، سولتۇستىك قازاقستان، تۇركىستان، شىعىس قازاقستان وبلىستارىنىڭ تۋمالارى.
ەلشىلىك قىزمەتكەرلەرى ازىرگە ەسىمى انىقتالعان 74 ساربازدىڭ ەكەۋىنىڭ عانا ۇرپاعىن تاۋىپ، ءسۇيىنشى حاباردى جەتكىزگەن. قالعاندارىنىڭ تۋعان-تۋىستارىن ىزدەستىرىپ جاتىر. ەلشىلىكتىڭ، سىرتقى ىستەر مينيسترلىگىنىڭ سايتتارىنان اتالارىنىڭ ەسىمىن تاۋىپ، سكانديناۆ ەلىندەگى زيراتىنا كەلەم دەۋشىلەرگە ەلشىلىك قىزمەتكەرلەرى قولدان كەلگەن كومەكتى كورسەتۋگە دايىن. ديپلوماتتار قىرشىننان قيىلعان بوزداقتاردىڭ ەسىمىن، جاتقان جەرىن انىقتاۋ جۇمىستارىن ءارى قاراي دا جالعاستىرا بەرمەك.