ارمەنيانىڭ پرەمەر-مينيسترى نيكول پاشينيان ستراتەگيالىق شەشىمنىڭ قابىلدانعانىن جانە ەلدە جاڭا اتوم ەلەكتر ستانسياسى (اەس) سالۋ جوسپارلانىپ جاتقانىن مالىمدەدى — بۇل ءمودۋلدى ستانسيالار بولادى. الايدا، وسى تەحنولوگيانى جەتكىزۋشى ەل ءالى تاڭدالماعان. بۇل تۋرالى نيكول پاشينيان ەريەۆاندا وتكەن الەمدىك ارميان سامميتىندە ايتتى، دەپ حابارلايدى aqshamnews.kz Kazinformعا سىلتەمە جاساپ.
نيكول پاشينياننىڭ ايتۋىنشا، جاڭا اەس قۇرىلىسى ەلدىڭ ەنەرگەتيكالىق سەكتورى ءۇشىن ماڭىزدى جوبالاردىڭ ءبىرى. ول ارمەنيا بيلىگى ءمودۋلدى ستانسيالاردى تاڭداپ، ستراتەگيالىق شەشىم قابىلداعانىن اتاپ ءوتتى. مۇنداي تاڭداۋ ەكولوگيالىق تۇرعىدان ستانسيانىڭ قورشاعان ورتاعا اسەرىنە بايلانىستى جاسالعانىن ءتۇسىندىردى.
— الەمدە جۇمىس ىستەپ تۇرعان ءمودۋلدى اەس-تەر ءالى جوق، ءبىراق بىرنەشە جوبا ءارتۇرلى دايىندىق دەڭگەيىندە بار. ەڭ ۇلكەن جەتىستىكتەر اقش-تا بايقالسا دا، بۇل باعىتتا فرانسيا، رەسەي جانە وڭتۇستىك كورەيا دا بەلسەندى جۇمىس ىستەپ جاتىر، — دەدى نيكول پاشينيان ءمودۋلدى اەس تەحنولوگياسى تۋرالى.
بۇرىن ارمەنيادا جاڭا اەس قۇرىلىسىنا دايىندىق جۇرگىزۋ قاجەتتىگى ايتىلعان بولاتىن. ماگاتە مالىمەتتەرى بويىنشا، قازىرگى ارميان اەس-ى ەلدەگى وندىرىلەتىن ەلەكتر ەنەرگياسىنىڭ شامامەن 30%-ىن بەرەدى. ارميان اەس-ى 2016 جىلى جۇمىسىن اياقتاۋى كەرەك ەدى، ءبىراق ونىڭ قىزمەت ەتۋ مەرزىمى 2026 جىلعا دەيىن ۇزارتىلدى. سوڭعى باعالاۋلار بويىنشا، ستانسيا 2036 جىلعا دەيىن جۇمىس ىستەي الادى.
2024 جىلدىڭ 1 تامىزىندا ارمەنيا ۇكىمەتىنىڭ شەشىمىمەن جاڭا اەس سالۋعا ارنالعان جەكە كاسىپورىن قۇرىلدى. بۇل كومپانيا جوبانى نەگىزدەپ، ۇكىمەتتىڭ ماقۇلداۋىن العاننان كەيىن حالىقارالىق سەرىكتەستەرمەن كەلىسسوزدەر جۇرگىزىپ، جاڭا ستانسيانى سالۋعا قاجەتتى ۇيىمداستىرۋ جانە قارجىلاندىرۋ ماسەلەلەرىن شەشۋى ءتيىس.