وزبەكستاندا 1 شىلدەدەن باستاپ حالىققا نەسيە بەرۋ شارتتارى كۇشەيتىلەدى. ءتيىستى قاۋلىنى وزبەكستاننىڭ ورتالىق بانكى قابىلدادى، دەپ حابارلايدى اlmaty-akshamy.kz.
ورتالىق بانك حالىقتىڭ قارىز اۋىرتپالىعىنىڭ كورسەتكىشىن - اي سايىنعى نەسيە تولەمدەرىنىڭ قارىز الۋشىنىڭ كىرىسىنە قاتىناسىن ەنگىزەدى. 2024 جىلدىڭ 1 شىلدەسىنەن باستاپ نەسيەلەۋ ءليميتى 60 پايىز دەڭگەيىندە بەلگىلەندى، ياعني، قارىز الۋشى ءوز كىرىسىنىڭ 60 پايىزىن ولاردى وتەۋگە جۇمساعان جاعدايدا بانكتەر نەسيە بەرۋدەن باس تارتادى. 2025 جىلدىڭ 1 قاڭتارىنان باستاپ قارىز جۇكتەمەسى 50 پايىزعا دەيىن تومەندەيدى.
جاڭاشىلدىق تۇرعىنداردىڭ كىرىسىن بارىنشا اشىق باعالاۋعا، كىرىستەرىن زاڭداستىرۋعا العان قارىز الۋشىلاردى ىنتالاندىرۋعا، بانكتەردى جاۋاپتى نەسيەلەندىرۋگە ىنتالاندىرۋعا مۇمكىندىك بەرەدى.
ورتاشا ايلىق تابىس جالاقىنى، زەينەتاقىنى، بانك شوتىنداعى كىرىستى جانە تولەنگەن سالىقتاردى قوسا العاندا، سوڭعى 6 ايداعى دەرەكتەر نەگىزىندە ەسەپتەلەدى. ەگەر نەسيەنى وتەۋ مەرزىمى 36 ايدان اسسا، وندا سول كەزەڭدەگى ورتاشا تابىس ەسەپكە الىنادى.
يپوتەكالىق نەسيەنى بەرۋ كەزىندە نەسيە مەرزىمى بۇرىن جوسپارلانعان 120 ايدىڭ ورنىنا 180 ايعا دەيىن ارتادى.
جاڭا تالاپتار بانكتەردىڭ نەسيە پورتفەلىنىڭ 85 پايىزىنا قاتىستى بولادى. قالعان 15 پايىزىن بانكتەر قارىز الۋشىنىڭ قارىز جۇكتەمەسىن ەسەپكە الماي، ءوز قالاۋى بويىنشا بەرە الادى.