نەپال پرەزيدەنتى رام چاندرا پاۋدەل 73 جاستاعى كاركيدى وسى قىزمەتكە بەكىتىپ، ول جۇما كۇنى، 12 قىركۇيەكتە انت قابىلدادى.
كاركي نەپال ۇكىمەتىن باسقارعان تاريحتاعى العاشقى ايەل اتاندى، - دەپ حابارلايدى Aqshamnews.kz.
ونىڭ كانديداتۋراسىن نارازىلىق اكسياسىنىڭ كوشباسشىلارى ۇسىنعان. ول 2026 جىلدىڭ ناۋرىز ايىندا ءوتۋى ىقتيمال كەلەسى سايلاۋعا دەيىن نەپال كابينەتىن باسقارادى.
dpa اگەنتتىگىنىڭ مالىمەتىنشە، كاركي ەلدە سىبايلاس جەمقورلىققا قارسى كۇرەسىمەن بەلگىلى.
نەپال ۇكىمەتى 9 قىركۇيەكتە جاپپاي نارازىلىقتارعا جانە ادام شىعىنىنا اكەلگەن الەۋمەتتىك جەلىلەرگە سالىنعان تىيىمدى الىپ تاستادى.
داعدارىس ۋشىققان تۇستا پرەمەر-مينيستر شارما ولي، ىشكى ىستەر ءمينيسترى جانە تاعى ەكى مينيستر وتستاۆكاعا كەتتى.
20-دان استام الەۋمەتتىك جەلىنى، سونىڭ ىشىندە Facebook، Instagram جانە YouTube-تى قامتىعان تىيىم نەپالدا ولاردىڭ جاڭا تالاپقا – مەملەكەتتىك قاداعالاۋعا تىركەلۋ جانە باعىنۋ ەرەجەسىن ورىنداماعانى ءۇشىن ەنگىزىلگەن ەدى.
بلوكادالاردىڭ الىنعانىنا قاراماستان، شەرۋلەر توقتاعان جوق: ولاردىڭ قاتىسۋشىلارى، نەگىزىنەن جاستار، ەلدەگى سىبايلاس جەمقورلىق پەن بيلىكتىڭ جالپى ساياساتىنا قارسى شىقتى. اقپارات اگەنتتىكتەرىنىڭ حابارلاۋىنشا، مىڭداعان دەمونسترانتتار جەتەكشى پارتيالاردىڭ كەڭسەلەرىن جانە كەيبىر ساياساتكەرلەردىڭ ۇيلەرىن قيراتتى ءارى ورتەدى. نارازىلار "نەپال كونگرەسى" پارتياسىنىڭ كەڭسەسىن جانە بىرنەشە پوليسيا بولىمشەسىن وتقا قويعان. نەپالداعى جاپپاي نارازىلىقتار "Z بۋىنىنىڭ دەمونستراسيالارى" دەپ اتالىپ ءجۇر.
پوليسيامەن قاقتىعىس سالدارىنان كەمىندە 51 ادام قازا تاۋىپ، 1300-دەن استامى جاراقات الدى.