نەلسون ماندەلانىڭ نەمەرەسى ق ر تۇڭعىش پرەزيدەنتى قورىنىڭ شاقىرتۋىمەن ەلگە رەسمي ساپارمەن كەلدى، دەپ حابارلايدى almaty-akshamy.kz ق ر اقپارات جانە قوعامدىق دامۋ مينيسترلىگىنىڭ باسپا ءسوز قىزمەتىنە سىلتەمە جاساپ.
«Thembekile Mandela Foundation» قورىنىڭ پرەزيدەنتى نديلەكا ماندەلا حانىممەن دوستىق ۇيىندەگى كەزدەسۋدى ق ر اقپارات جانە قوعامدىق دامۋ مينيسترلىگى ەتنوسارالىق قاتىناستاردى دامىتۋ كوميتەتىنىڭ وكىلدەرى ۇيىمداستىردى.
جۇزدەسۋگە قولدانبالى ەتنوساياسي زەرتتەۋلەر ينستيتۋتى، «قازاقستان-وار» حالىقارالىق قورىنىڭ باسشىلىعى، قازاقستان حالقى اسسامبلەياسى كەڭەسىنىڭ مۇشەلەرى مەن نۇر-سۇلتان قالاسى اكىمدىگىنىڭ وكىلدەرى شاقىرىلدى.
كەزدەسۋ بارىسىندا تۇڭعىش پرەزيدەنت – ەلباسى ن. نازاربايەۆتىڭ بەيبىتشىلىك پەن كەلىسىمدى نىعايتۋ جونىندەگى باستامالارى، قازاقستان حالقى اسسامبلەياسىنىڭ قىزمەتى جانە ونى ودان ءارى دامىتۋ، ەتنوسارالىق قاتىناستار سالاسىنداعى وزەكتى عىلىمي زەرتتەۋلەر مەن ىنتىماقتاستىقتى دامىتۋ ماسەلەلەرى تالقىلاندى.
سونداي-اق، شارا بارىسىندا 2021 جىلى وار-داعى قازاقستان ەلشىلىگى شىعارعان كورنەكتى ويشىل ءابۋ-ناسىر ءال-فارابيدىڭ ءومىرى مەن شىعارماشىلىعى تۋرالى «Treatise on the need to strive for an excellent state» كىتابىنىڭ تۇساۋكەسەرى ءوتتى جانە دوستىق ءۇيىنىڭ قىزمەتىمەن تانىستىرۋ ۇيىمداستىرىلدى.